SHILLONG: A·dok sorkarini ku·rachakaniko chu·ongnikjaenba, Samagra Shiksha Abhiyan (SSA) skulrango skigiparang, Shillong songjinmani Additional Secretariat sambao ari gri asonge jingjengatangkuna tik ka·angaha.
Meghalaya SSA Schools Association (MSSASA)-ni president Aristotle Rymbai-ni parakatani gitade, Sombar salo uamang, Education department-ni Additional Secretary DP Wahlang-ko gronge, skigiparangni dabienggipani bidingo agangrikangahachim indiba uni ku·rachakaniko chu·ongnikjae skigiparang, asonge jingjengatangkuna tik ka·e donangaha.
SSA skulrango skigiparang, re·anggipa February jaonin jabongani dormaharangko man·kujaengani gimin ia dormaharangko changsanon on·china gita dabitokengachim ine nikna man·a.
“Education official-ni chingna parakatani gitade, Finance department-onin tangka paisarangko sokatkujaengani a·selsa Education department, chingna dormaharangko on·na man·kujaenga indiba chinga iandakgipa kattarangko ra·chakna man·jawa,” ine MSSASA-ni president parakataha.
Education official-ni skigiparangna parakatani gitade, SSA skulrango skigiparangna jabongani dormahako on·na gita komibeoba gong kror 44-mangko nangengachim.
“Ia bilsini tangka paisarangko ma·mong sorkarionin on·atkujaenga aro da·alona kingkingan a·songni pilak a·dokrangan paisa pelsakoba man·soa dongkujaenga ine chingna Additional Secretary aganaha. Re·anggipa bilsio ma·mong sorkarini on·atgipa tangka paisarangko bang·bata a·dokrangan watkujaenga ineba ua chingna aganaha,” ine Rymbai parakataha.
Skigiparangna dormahako bariatani bidingo janapatengon, a·doko tangka paisani gita neng·nikanirangko chagrongna nangengani gimin skigiparangna dormahako bariatani bidingo Education department, obostarangko name niengkua ine Additional Secretary u·iataha ine MSSASA-ni president parakataha.