SHILLONG: 2023 bilsini Meghalaya Assembly election-na skang, dingtang dingtang dolni dilgiparang United Democratic Party (UDP)-o naptokengahani gimin mikkangchi UDP, bilakgipa aro kenna nanggipa dol ong·enga ine UDP-ni general secretary Jemino Mawthoh parakataha.
“Meghalaya a·doko politics-ni gita ong·enggipa obostarangko niatgenchimode pilakni gitan UDP bilakrorobaenga ine nikna man·gen. Salantian gipin dolrangni dilgiparang UDP-ona re·baroroenga aro ian UDP-ko mikkangchi bilakgipa dol ong·gen ine mesokaniba ong·enga,” ine Mawthoh parakataha.
Mawthoh-ni parakatani gitade, dingtang dingtang dolni MLA-rangba UDP-o napna tarie dongtokenga aro da·o ia MLA-rang, anti-defection law-oni jokna gitasa cholrangko senge dongtokenga.
“Chinga Meghalaya a·dokna nangenggipa dilgiparangko rimbana gita dingtang dingtang constituency-o susaatna namnamgipa candidate-rangko man·na ka·dongenga,” ine ua aganaha.
Meghalaya a·doko namroro silroroaniko ra·bana, tom·tomaniko rakkiangna aro dingtang dingtang kamrango tang·doaniko ra·bana gita uamang, namnamgipa dilgiparangchi sorkariko rikna miksongenga ineba Mawthoh aganaha.
“Chinga miksongani gnang re·mikkangaha indiba mitam biaprango neng·nikani aro ra·bianirang dongkuenga. Chinga dolni gita ia neng·nikanirangko namatna aro a·doko songdongenggipa manderangni namgnina kamko ka·na miksongenga,” ine UDP-ni general secretary aganaha.
Election-na skang gipin dolrang baksa bakrime kam ka·soani gimin janapatengon, da·o dipet gipin dolrang baksa bakrime kamko ka·soani gimin chanchia dongkuja indiba iani bidingo dolni dilgiparang apsan chanchirimchengna nanggen ine Mawthoh parakataha.
“Chinga Regional Democratic Alliance-ni ning·o Hill State People’s Democratic Party (HSPDP) baksa bakrimani donga indiba mikkangchi kamrangko nambate ka·na man·na gita gipin dolrang baksa bakrimanio gipin dolrangni aganchakanikoba nichengna nanggen,” ine Mawthoh aganaha.