TURA: July-ni 30 tariko manirongenggipa ‘World Day Against Human Trafficking’-ni bak gita India a·songni simarango bi·sa badingsrukaniko champengani bidingo manderangna mikrakataniko on·na gita Mongolbar salo dingtangmancha sensitization program-ko Tura-ni District Auditorium-o ong·atangaha.
Ia program-ko National Commission for Protection of Child Rights (NCPCR), State Commission for Protection of Child Rights (SCPCR) aro West Garo Hills District Administration baksa nangrime ong·atangaha aro ia program-ko ong·atanio Expert Resource Person ong·e sokbagipa Rahul Pawa, power point presentation-ko dake, bi·sa badingsrukaniko champengani bidingo jinmana agan-talate on·angaha.
Ia program-ko ong·atanio West Garo Hills a·jani Deputy Commissioner Swapnil Tembe-ba dongpae jinmana aganprakangengon, bi·sarangko naljoke rakkiani bidingo manderangna mikrakataniko on·na gita iandakgipa program-rangko ong·atjringna nanga ine aganangaha.
Ia tom·anio West Garo Hills a·jani Superintendent of Police (SP) VS Rathore-ba dongpae jinmana aganprakengon, bi·sarangko ong·gija dake jakkalna, kamrangko ka·atna aro maming dormaha gri indin kamrangko ka·atna gita a·dokoniko palsrukatrongenga aro ian bi·sarangna on·gimin bilrangko pe·ani gita ong·enga ine bi·sa badingsrukaniko champengna gita manderangna mikrakatanirangko on·angkuchina didiangaha.
Ia program-ko ong·atanio dongpae jinmana aganprakanggipa gipin manderangara, SCPCR-ni Membor Mir K Marak aro gipinrang ong·a.
