WGH-ni a·kawe jolrango salantian bijoli sirongengani a·sel neng·nikaniko man·tokenga

TURA: West Garo Hills a·jani a·kawe jolrango salantian konta 12 batpile bijoli sirongengani a·sel, jolo songdongenggipa manderang neng·nikanirangko man·tokenga ine kobor on·aha.

Jolo songdongenggipa manderangni u·iatani gitade, ia jolrango iandakgipa obostako chagrongna nangani da·o jagni batpilengaha aro bijoli donggenchimoba, voltage namen komiani a·sel light bulb-rangna bate mombatirangan teng·batpilengachim.

Tikrikilla-oni Hallidayganj jolrangona kingkingan salo bijoli dongjaengani a·sel manderang chaktokpilgijagipa ding·aniko chakna nangtokenga aro attamoba dikdiksa somoirangna bijoli sokbagenchimoba voltage komiani a·sel bijoli dongani maming namgnirangkon man·jaenga ine jolo songdongenggipa manderang parakataha.

Iani bidingo sing·sandiaton, maini gimin salantian ia jolrango konta 12 batpile bijoliko kimitenga darangba maming kobor dongkujaenga ineba jolni manderang parakatskaaha.

Salo salgimik bijoliko kimitengani gimin dokkan dakenggipa bang·bata manderangan generator-rangkosa jakkalna nangtokenga aro uandaken generator-rangko jakkalanio komibeoba gong 500-mangni torangko brena nange noksan ong·na nangskaenga ineba kobor on·timgiparang parakataha.

“Walni somoirangoba ia jolrango voltage chu·ongjaengani a·selan chinga fan-rangkoba watna man·jae ding·ako chake dongtokna nangenga. Fan-rangko watanide chel·srangkua maina chinga iandakgipa voltage-chi an·tangtangni mobile phone-rangkon charge ka·na man·jaenga,” ine Phulbari-o songdongenggipa mande saksa parakataha.

Ia jolrango bijoliko nirokna gita private company FEDCO-na on·ahachim aro manderangni parakatani gitade, kamko ia company-na on·a intalan ia jolrango bijoliko on·ani namsrangjahachim.

Indake ong·genchimoba, iandake matnanganiko company-ni official-rang jegalatskaaha aro ia company-ni man·soenggipa bijolian komiengani a·selsa bijoliko on·aniba nangchakeaniko man·enga ine parakataha.

“33KV line-o chinga 19KV-mangni gitasan bijoliko man·soenga aro iani a·selsa bijoliko on·ani nangchakeaniko man·enga. A·kawe jol gimikon ia apsan dakgipa obostako chagrongna nangenga. Chinga chu·gimik bijoliko man·sojaskal bijoliko chu·onga gita on·na man·kujawa,” ine company-ni official saksa parakataha.

Get real time updates directly on your device, subscribe now.

Comments are closed.