SHILLONG: 2023 general assembly election-rang da·o sepangbarikrikengon, aro National People’s Party (NPP)-ni bilakanirangko nikengon, opposition Trinamool Congress, Meghalaya Democratic Alliance (MDA)-ni MLA-rangko an·tangchi salna gita ropna krengbeenga ine NPP vice president aro Deputy Chief Minister Prestone Tynsong matnange aganaha.
MDA-ni MLA-rangko TMC ropna jotton ka·beenga ine matnange aganengon, AITC, MDA-ni MLA-rangko ropna gita MLA sakantionan mande watenga indiba chingoni darangba gong·gipa dongja. Indakgipa kamko AITC salantian dakenga. Chingni MDA-ni MLA ka·rimskarangko uamang grongsimaienga ine NPP vice president aro Deputy Chief Minister Prestone Tynsong aganaha.
Minggipinara, Chief Minster Conrad K Sangma, uamangni party-ko bon·atna aro uamangni party worker-rangko ja·gipuatna jotton ka·enga ine TMC chanchienga. Unigisepon, re·baenggipa 2023-o uamang maming dingtanganiko ra·bana man·jawa, ukoba opposition dol ma·siaha, uni giminsa uamang MDA-ni MLA-rangko ropna jotton ka·enga, Tynsong aganaha.
Nang·onaba AITC ropna re·bachima ine sing·on, “angchide re·baa dongja indiba gipin MLA-rangkosa grongenga. Uamang an·tangtangchi salna jotton ka·enga,” Tynsong aganaha.
NPP-ni ka·dongsoani gita re·baenggipa 2023 assembly election-o badita seat-rangko man·gen ine singon, uamang ge 34-35 seat-rangko man·na nidingenga ine ua aganchakaha.
Unaskang chief minister Conrad Sangma indake aganengachim je sak 12 TMC MLA-rangoni sakbongade gipin poltical party-rang baksa bakrimna chol sandienga.