SHILLONG: Meghalaya a·doko niam gri koela bikotani aro koela salruraaniko NPP-chi dilenggipa MDA sorkarian dakdilenga ine a·dokni Opposition Trinamool Congress (TMC) matnangataha.
TMC-ni Chief Whip George B Lyngdoh-ni parakatani gitade, a·doko niam gri koela bikotani aro koela salruraanirangko changni chang rim·a man·engoba, niam gri koela badinganiko a·dok sorkari jegalrongaiachim.
Niam gri koela salruraaniko changni chang rim·a man·engani gimin janapatengon, iandake niam gri koela badinganiko dal·dalgipa aro bil donggipa manderangsa dangdilna nanga ine Lyngdoh parakataha.
“Sorkariko rikchengani somoio NPP-chi dilenggipa MDA sorkari, jadokni gisepon niam gita koela bikotaniko a·bachengatgen ine ku·rachakahachim. Da·o ia sorkarina jadoksan dongaiaha indiba maming kamrangan chu·sokkujaenga,” ine Lyngdoh aganaha.
Re·anggipa Sonibar salosan, Simsang chibima gita Bangladesh a·songona ra·angna miksonge donenggipa bostani bosta koelarangko South Garo Hills a·jani headquarter Baghmara-oniko man·ahachim ine nikna man·a.
South Garo Hills a·jani Gasuapara-o chimonge donenggipa koelarangni bidingo adita salrangna skangsan, a·dok sorkari, Meghalaya High Court-na preliminary report-koba on·angahachim.
Comments are closed.