TURA: Garo Hills-o dingtang dingtang case-rangko nambate kam ka·na aro matchotatna man·na gita Meghalaya High Court-ni Bench-ko Garo Hills-oba kulichina didie, Budbar salo Williamnagar Bar Association-ni dilgiparang, a·dokni Chief Minister Conrad K Sangma-na memorandum-ko on·ataha.
Garo Hills-o High Court-ni dingtang bench-ko kulichina didiatengon, High Court da·o dipet Shillong songjinmaosan dongkuengani a·sel Garo Hills-ni ja·delgimin ukilrangde, an·tangtangni kamrangko namdapatna cholrangko man·kujaenga aro dingtang dingtang case-rangni gimin badi ka·gipa manderangba neng·nikanirangko chagrongna nangtokenga ine Williamnagar Bar Association-ni dilgiparang parakataha.
Association-ni parakatani gitade, dingtang dingtang case-rangni bidingo badi ka·gipa manderang, Shillong-ona re·ruraanio neng·nikanirangko chagrongna nangengani a·selan, mitam mongsonggipa case-rangkode High Court-o bon·ataiahachim.
“Dingtang dingtang case-rangni bidingo badi ka·gipa Garo Hills-ni manderang, hearing donga changantian Shillong-ona re·rurana nangani gimin basakobarangde an·tangtangni case-rangko jako ra·angkuna sikjae bon·ataona sokenga maina Shillong-ona re·ruraanio koros aro somoirangko galna nange cholgri ong·pagipa manderangde neng·nikanirangko chagrongna nangtokenga,” ine Williamnagar Bar Association parakatenba, iandakgipa neng·nikanirangko chagrongna nangjana gita Garo Hills-ona High Court-ni bench-ko kulichina Chief Minister-ko didiataha.
Garo Hills-o High Court-ni bench dongjani a·selan kam changgimin ukilrangba cholrang dongjae, senior lawyer-rang ong·pana man·jaenga ineba Williamnagar Bar Association parakataha.
Garo Hills-o High Court-ni bench-ko kulichina didiatengon, ia bench-ko East Garo Hills a·jani Williamnagar-o kulichina gitaba Association didiataha.
“Williamnagar-o bigha 5000-mangna baten sorkarini a·arang donga aro ia a·arangko maming kamnaba jakkalgija donenga. Ia a·ako sorkari, High Court-ni bench-na jakkalanio maming neng·nikani dongjawa,” ine association parakataha.
Indake ong·engon, Williamnagar Bar Association-ni nangnikanirangko a·dokni Chief Minister niatna ku·rachakangaha aro iani bidingo ua Meghalaya High Court-ni Chief Justice baksa bakan agangrikena ku·rachakaha ine association-ni dilgiparang parakataha.