‘Har Ghar Tiranga’-ni bak gita CRPF rally-ko ong·ata

TURA: Azadi ka Amrit Mahotsav-ni bak gita India sorkarini a·bachengatgipa ‘Har Ghar Tiranga’ campaign-ni bak gita Bristibar salo, 120 Battalion CRPF dolni gita walkathon ba re·jomaniko Tura jillao ong·atangaha.
Ia CRPF dolni re·jomaniko 120 Bn CRPF-ni Commandant Pramod Kumar Singh, a·bachengate on·angaha aro ia re·jomanio bike bol 10 aro gari bol 3-oba CRPF sipairang bakko ra·angaha.
CRPF dolni re·jomaniko Tura jillani SP Office, Supermarket aro Hawakhana gita dakangaha, jeon CRPF-ni sipairang, jillao songdongenggipa manderangko, August 13 tarikoni August 15 tarikona noktangtango a·songni nisanrangko songchina didiangtokaha.
A·songni jakgitelaniko salko manina gita ia salgittamna a·songni nisanrangko noktangtango songchina gita 120 Bn CRPF-ni Commandant Pramod Kumar Singh-ba didiataha.
CRPF dolni re·jomanio 120 Bn CRPF-ni Deputy Commandant Savita Yadav, Assistant Commandant Dipak Kumar aro gipin officer-rangba bakko ra·angaha.