TURA: Garo Hills-na High Court-ni Bench-ko on·china dabiangani ja·man, District Council Court-ko songe on·an baksana East Garo Hills a·jao GHADC-ni branch office-rangkoba kulichina gita Sukrobar salo, Williamnagar Bar Association (WBA) dabiangaha.
Sukrobar salo WBA-ni dilgiparang, Garo Hills Autonomous District (GHADC)-ni chief executive membor (CEM) Albinush R Marak-ko grongenba, iani bidingo memorandum-ko on·angaha.
WBA-ni parakatani gitade, iani bidingo executive committee-ni tom·aniko ong·atenba chanchirimna gita GHADC-ni CEM, uamangna ku·rachakaniko on·ataha.
East Garo Hills a·jao GHADC-ni branch office-rangko kulichina dabiangengon, a·jani manderang, Tura-ona re·rurana nanggijan a·ani kajina, professional tax, trading licence tariani kajina, a·a pattarangko on·na aro uandakgipa dingtang dingtang kamrangko ka·na man·na gita GHADC-ni branch office-rangko nangchongmotenga ine WBA-ni membor-rang parakataha.
Williamnagar-o GHADC-ni a·arang chu·onga gitan donga ine janapatengon, Williamnagar-o donggipa GHADC-ni a·arangko da·o dipet gipin department-rangnasa para on·enga aro ia a·arangko District Council Court aro pilak branch office-rangnan jakkalskana man·gen ine WBA parakataha.