SHILLONG: Hynniewtrep National Liberation Council (HNLC) bobil dol baksa agangrikani report-rangko a·dok sorkari, ku·baltitimgipaoniko aro central observer-oniko sengengkua ine a·dokni Deputy Chief Minister Prestone Tynsong parakataha.
HNLC bobil dol baksa agangrikani kamrangko a·dok sorkari ta·raken matchotatna nangnikenga ineba Tynsong parakataha.
Adita salrangna skang, HNLC-ni raising day-ko maniani bak gita Jaiaw-ni Jingthang Briew samba jolo donggipa dolongo HNLC-ni nisanko songdogipani gimin sing·on, iako saoba HNLC-ni nisan dongsogipa mandesa songdoahakon indiba ian maming dal·a katta ong·ja ine Tynsong parakataha.
Re·baenggipa 2023 bilsini Assembly election-na National People’s Party (NPP)-ni tikitrangko suale on·anio maming neng·nikani dongjawa ineba NPP-ni national vice president parakataha.
Tynsong-ni aganani gitade, re·baenggipa bilsini Assembly election-o a·dokni dam 60 constituency-rangon susana gita NPP-ni candidate-rangko seokani kamrang matchotangengaha.
Gipin political dolrangde an·tangtangni candidate-rangko seokanio neng·nikanirangko chagrongna nangtokenga indiba NPP-de dam 60 constituency-rangnan kragipa candidate-rangko seokmanangengaha ineba Tynsong parakataha.
Harijan Colony-o songdongenggipa manderangko apjitani gimin sing·on, da·o dipet ia biapo songdongenggipa manderangko gipin biapona apjitna gita Urban Affairs department, blueprint-ko sorkarina on·kujaenga ine Deputy Chief Minister parakataha.