SHILLONG: Shillong-Dawki ramako tarina gita bakan tender on·piltaiani kamko a·bachengatgen ine a·dokni Deputy Chief Minister aro PWD (Roads) Minister Prestone Tynsong parakataha.
Shillong-Dawki ramako tarianio a·a nokgiparang jegalahani a·sel kamrang ja·manchakatako man·na nangahachim.
Indake ong·engon, adita salrangna skang uni New Delhi-ona re·angani somoio ua National Highways & Infrastructure Development Corporation (NHIDCL)-ni managing director-ko gronge agangrikbaaha ine PWD (Roads) Minister parakataha.
“Ia ramako tariani bidingo anga NHIDCL-ni managing director baksa agangrikbaaha aro iana bakan tender-ko on·piltaignok,” ine Tynsong aganaha.
National Highway-6-ni Umiam-Shillong ramako tarina gita tender-ko on·china NHIDCL-ko PWD ge·etmanaha ineba ua aganaha.
“Iana DPR aro korosrangko NHIDCL tariengaha aro bakan ia ramako black topping on·e taridapna gita uamang tender-ko on·gnok,” ine PWD (Roads) Minister parakataha.