TURA: Ia sal somoirango, skulrangchi re·enggipa chatro chatrirang, traffic-ni niamrangko tale ma·sichenggija aro licence-rang donggija bike aro scooty dakgipa gari gorarangko skulrangchi sale re·engani a·sel, bang·a changon a·sel ong·anirangko nikna man·engani gimin Bristibar salo East Garo Hills a·jani police-rang, Chiading-o donggipa Gasa English Medium School-o poraienggipa chatro chatrirangna Traffic-ni niamrangni gimin agan-talate on·anirangko dakangaha.
Ia awareness program-ko ong·atanio East Garo Hills a·jani police officer-rang, Motor Vehicle Act aro Indian Penal Code (IPC)-ni ning·o dongimin dingtang dingtang niamrangni gimin talate on·angenba, gari gorarangko jakkalengon, licence-rang gnang aro helmet-rangko ganesa salchina skulo poraienggipa chatro chatrirangko didiangaha.
Skulrangchi bike aro scooty-rangko ra·angna on·gija an·tangtangan detangtangko skulrangchi sale donchina gitaba police officer-rang, skulrango poraienggipa bi·sarangni ma·a paarangko didiataha.
Adita salrangna skangsan, East Garo Hills a·jani Songsak jolo, skulo poraienggipa chatrorang, motorcycle-ko sale re·angenba, gari bolsa baksa su·gake a·sel ong·ahachim aro ia a·sel ong·anio chatro sakgittamoni saksade a·sel ong·chakgipa biapon sikamahachim.
Iandakgipa a·selrang ong·jana gita aro an·tangtangna naljokaniko man·na gita skatang gari gorarangko saljachina gita police officer-rang, skulo poraienggipa chatro chatrirangko didiataha.
