SHILLONG: Assam aro Meghalaya a·dokni simarango ong·enggipa golmalrangko namatna ja·ku de·anio, bangki dongenggipa damdok jolrangko namatna gita a·dok damgnini chief minister-rang, Robibar salo Guwahati songjinmao apsan tom·enba skanggipa changna chanchirimangtaiaha.
A·dok damgnini chief minister-rang, tom·e chanchirimangani ja·man, kobor ra·timgiparangna talataniko on·angengon, a·dok damgnini simarango meligrikna man·jaenggipa damdok biaprang, chong·motan Psyiah, Khanduli, Block I aro II, Borduar, Mawtawar aro Langpih jolrangko namatna gita sal 15-ni gisepon Assam aro Meghalaya sorkarirang, regional committee-rangko songgen aro ia regional committee-ni chairman-na a·doktangtangni cabinet minister-rangko songe donanggen ine Meghalaya a·dokni Chief Minister Conrad K Sangma parakataha.
Ia regional committee-rango Karbi Anglong District Council-ni membor-rangkoba bak ong·atna tik ka·angaha ineba Sangma parakataha.
Meghalaya Chief Minister-ni parakatani gitade, regional committee-rangko songmanahaon, a·doktangtangni committee-rang, golmal ong·enggipa biaprangona re·ange, songni manderang baksa agangrikanggen aro a·dok damgnini chief minister-rangba, meligrikna man·jaenggipa mitam biaprangona re·ange songni manderang baksa agangrikanggen.
Skanggipa damdok biaprangko namatna ja·ku de·anggipani bidingo janapatengon, da·o ia biaprango survey-rangko ka·e a·dok damgnini simarangkon salna gita a·bachengengaha ine Sangma parakataha.
“Ia survey ka·aniko matchotatna gita Meghalaya aro Assam a·dokni dolgni sorkarirangan nangrime kamko ka·enga,” ine Meghalaya Chief Minister aganaha.
Sangma-ni parakatani gitade, a·dok damgnini simarango songdongenggipa manderang, batanggimin bilsi 50-na neng·nikanirangko chagrongna nangtokengahani gimin uamangni neng·nikanirangko ta·raken namatachina gita ia jolrango songdongenggipa manderang, a·dok sorkariko didiangahachim.
“Simarango songdongenggipa manderangni neng·nikanirangko namatna gita ia sorkari on·kange kamko ka·enga aro iani giminsa sorkari, jolo songdongenggipa manderang baksa agangrikchenge damdok biaprangko namatna gita ja·kuko de·aha. Apsan daken da·o bangki dongenggipa damdok biaprangkoba chinga manderang baksa agangrike kamrangko chu·sokatna ka·dongenga,” ine Chief Minister parakataha.
Ia kamara walsani gisepo matchotatna man·gipa kam ong·ja aro kamko ka·anio somoikode nangaigen ine janapatengon, kamrangko ka·anio niam gita ong·na on·na nanggen ine Sangma parakataha.
Simarango ong·enggipa golmalrangko namatna kam ka·anio agan-chanchirimna nanganirang bang·en donga aro ia kamo pilak nangchongmotgipa dolrangkoba bak ong·atna nanggen ineba Chief Minister aganaha.