SHILLONG: Assam aro Meghalaya a·dokni simarango ong·enggipa golmalrangko namatna ja·ku de·anio je songrangkon skanggipa bako gimaatna nangahachim da·o gnigipa bako nambate kamrangko ka·anichi ia songrangko Meghalaya a·dokona man·bapilna jotton ka·gen ine Mongolbar salo West Khasi Hills a·jani ning·o donggipa Rambrai Jyrngam-ni MLA Kimfa Marbaniang parakataha.
Marbaniang-ni parakatani gitade, a·dok damgnini simarango golmal ong·enggipa biaprangoni Langpih songara mongsonggipa songrangoni damsa ong·enga aro da·o ia jolrangkoba namatna gita a·dok damgnini dilgiparang kamrangko ka·chakatengahani gimin ia jolrangoba bakan tom·tomaniko ra·bapilna man·gen ine ua ka·dongenga.
A·dok damgnini simarango meligrikna man·jaenggipa biaprangko namatna kamrangko ka·anio songni nokni pilak dilgiparangko aro pilak dolrangkon bak ong·atchina gitaba ua didiataha.
“Skanggipa bakni damdok biaprangko namatna kam ka·anio mitam songrangko gimaatna nangahaoba da·o gnigipa bako ia songrangko man·bapilna gita krenge kamko ka·gen,” ine Marbaniang parakataha.
Meligrikna man·jaenggipa biaprangko namatna gita ja·kurangko de·engon, a·dok damgnini gisepo songgigrikani gamchatanikon skanggipa songni dilgiparangna aro songni manderangna agan-talatchenge on·china aro ja·mano songo noko donggipa manderangni nangnikanirangkoba ra·china gita Marbaniang didiataha.
“Kamrangko ka·anio an·ching songni Nokmarang, Sordarrang aro pilak dolrangkoba bak ong·atpana nangchongmota,” ine ua aganaha.
Indake ong·engon, Rambrai Jyrngam-ni MDC Bajop Pyngrope-ba, Langpih jolrango indita bilsirangna ong·enggipa golmalrangko bakan namatna ka·dongenga ine parakataha.
“West Khasi Hills a·jao an·ching dingtang dingtang dolrangni jegale jingjengatanirangko aro manderangna ma·sisretatanirangko nikna man·enga aro ian namen dukni ong·a. Skanggipa bako an·ching bang·a songrangkon gimaataha ine agananiara kakket ong·ja,” ine Pyngrope aganenba, ia manderang maini gimin Meghalaya a·dokona man·bagipa Tarabari aro uandakgipa songrangni giminde janapskajaenga ine sing·doataha.
“An·ching song damgittamko gimaatna nangaha ine chinga ma·sia indiba da·o gnigipa bako agangrikanichi chinga ia songrangko man·bapilna krengenga. An·chingni songrangko chinga pale cha·enga ong·ja indiba ian gitcham sorkarini papni a·selsa iandakgipa obostarangko chagrongna nangenga,” ine MDC parakataha.