TURA: Tura jillao ma·manti bosturangko aro mongsongbate cha·ani bosturangko dam rakbate palchina didiaha ine matnangenba Tura-o donggipa Meghalaya Chamber of Commerce (MCC)-ni kosako FIR ka·ani gimin Tura-ni BJP dol, West Garo Hills a·jani Deputy Commissioner Vivekanand Singh-ko jegalatenba, uko ta·raken kamoniko ra·galatchina dabiangaha.
Adita salrangna skang rim·ako man·gipa Tura-ni MDC Bernard N Marak-ni ning·o chalaienggipa Meghalaya Chamber of Commerce (MCC)-ni manderang, Tura-o dokkan dakenggiparangoniko kajinarangko gile ra·engani a·sel ma·manti bostuni damrang aro mongsongbate cha dokkanrango man·gipa cha·ani bosturangni dam rakbataha ine matnangenba, Tura MCC-ni kosako West Garo Hills Police-ni gita FIR ka·doangahachim.
Manderangni badi ka·anirangko man·soenba police-rang, dokkanrango palenggipa cha·ani bosturang dam rakbatengani gimin am·sandianirangko dakon, ia dokkanrangko MCC-ni manderang didiahani a·selsa cha·ani bosturangni dam rakbataha ine ma·sina man·aha ineba West Garo Hills a·jani SP parakatahachim.
Indake ong·engon, Tura-o donggipa MCC-ni kosako iandake matnangahani gimin West Garo Hills SP-ni kosako Tura BJP-ni general secretary Wilver Danggo jegalatskaenba, ia pilakan SP-ni BJP dolko matnangna jotton ka·anisan ong·enga ine uko kamoniko ra·galchina dabiataha.
“West Garo Hills a·jani SP-ko chinga kam ra·galchina dabiahani giminsa ua chingko ra·ongalna miksonge ia kattarangko parakataha. Manderangni nangchongmotgipa bosturangni dam Tura-osan rakbatenga ong·ja indiba a·song gimikon ong·enga. Indide a·song gimiko bosturangni dam rakbatenganiara Bernard, Wilver, Anish aro Patcheng-ni a·selsa ong·engama?” ine Danggo sing·doatenba, iani bidingo talataniko on·china SP-o dabiataha.
Bosturangni damrangko check ka·anio police-rangni bil jakkalani giminba ua sing·doataha.
“Bosturangni damrangko district administration-ni gitasa nirok sandina man·a aro police-rangde iako dakani ong·ja. Police-rangni kamde niam retiko rakkianisa aro dam barianiko nirok sandiani ong·ja. MCC-ara bading chiwalgiparangni dolsa ong·a aro iani dingtang dingtang jatrangoni sak 400-mangni gita membor-rang donga. Indide maini gimin Tura-ni SP, BJP-ni membor-rangkosan aro uaba jat ge·saonikosan matnange biming mingaha?” ine Tura BJP-ni secretary sing·doataha.