Williamnagar-o dingtanganiko ra·bana JDU ku·rachaka

TURA: Budbar salo Janata Dal (United) ba JDU Meghalaya Unit-ni tom·bimonganiko Williamnagar constituency-o ong·atangaha aro ia tom·bimonganio JDU Meghalaya unit-ni convenor aro re·baenggipa 2023 bilsini Assembly election-o Williamnagar constituency-oni susana sienggipa JDU-ni candidate Robinus T Sangma, jinmana aganprakangengon, manderangni seokako man·genchimode Williamnagar constituency-o pilakni gitan dingtanganiko ra·bagen ine ku·rachakaniko on·angaha.
Chidekgre secondary skulo uni skigipani kamko ka·engmiting somoirangko gisik ra·atpilangengon, uni ia skulo skigipani kamko ka·na skang ia skulo matric pass ka·giparang dongsrangjaengani gimin ia skulko chipa miksongahachim indiba ua skulni headmaster ong·e kamko ka·ahaon ia skulo matric segiparang bilsiantian first division-o pass ka·na a·bachengtokaha ine Sangma parakataha.
Loyola College committee-ni president ong·e kamko ka·anio ua dingtang dingtang ra·bianirangko chagrongna nangahaoba ua ia college-ko Garo Hills-o niksenggipa college ong·atna man·aha ineba JDU Meghalaya unit-ni convenor parakataha.
“Jekai anga batanggimin somoirango dingtang dingtang kamrangko chu·sokatahachim, da·o Williamnagar constituency gimiknan anga dingtanganiko ra·bana nangnikenga,” ine Sangma aganaha.
JDU dolosa manderang, chong·mot jakgitelaniko, jatni dakbewal rikbewalko rakkianio aro a·songo dingtang dingtang jat aro toromrangni meli nangrimaniko man·gen ineba ua tom·anio jinmana parakataha.
Ia tom·anio dongpae jinmana aganprakanggipa gipin manderangara, JDU East Garo Hills District-ni general secretary Prementh G Momin, JDU Meghalaya unit-ni general secretary Cyril Marak aro gipinrang ong·a.