WILLIAMNAGAR: Songadam nokadamrango donggipa manderangna aro game ge·e cha·enggipa manderangna janggi tangani cholrangko on·na gita a·dok sorkarini ra·gatgipa Rural Backyard Piggery Scheme, ba jekon ‘PROGRESS’ ine mingskaahachim, ia scheme-ni ning·o East Garo Hills a·jani game ge·e cha·enggipa manderangna Bristibar salo, a·dokni Chief Minister Conrad Sangma-ni jakchi gimik mang 76 wak bi·sarangko suale on·angaha.
National Livestock Mission-ni ning·o ‘Progress’ ine mingskagipa Rural Backyard Piggery Scheme-ko Budbar salo Ri Bhoi a·jani Byrnihat-o a·bachengate on·angahachim ine nikna man·a.
Chief Minister-ni parakatani gitade, a·doko game ge·e cha·enggipa manderangni man·gnirangko bariatna aro a·doko wak be·enrangni chu·onggijaniko namatna gita ia scheme-ko a·dok sorkari ra·gate on·aha.
Meghalaya a·doko ‘Progress’ scheme-ko ra·gatanichi songni nokni manderangna aro game ge·e cha·enggiparangna wakrangko jile cha·na on·anichi pangkamgipa janggi tangani cholrangko on·na ka·dongenga ineba Chief Minister parakataha.
Ia ‘Progress’ program-ko a·bachengate on·ani bidingo talataniko on·angengon, songadam nokadamrango wakrangko, do·orangko, do·bokrangko aro uandakgipa gipin jilla kaanirangko dake an·tangtangni janggi tangani gadangrangko namdapatna man·na gita sorkari, ia scheme-ko ra·gataha ine Chief Minister parakataha.
Chief Minister-ni parakatani gitade, Rural Backyard Piggery Scheme-ni skanggipa bako sorkari, gong kror 15.18 tangkarangko chame donaha aro iani ning·o bi·sa pe·ninggipa rokomni wakrangko ge 6000 nokdangrangna suale on·anggen.
