Mawkyrwat: National People’s Party (NPP)-chi dilenggipa, Meghalaya Democratic Alliance (MDA) sorry mijal salni bakko, South West Khasi Hills-o gesa mangmang donggipa, Mawkyrwat-ni Sngap Syiem College-ko, ‘Community College” ine, Meghalaya a·dokni bilsi sotbonga gapaniko maniani boksis ine agange oprake on·angaha.
Indake gitalgipa college-ni bimingko, Deputy Chief Minister, Prestone Tynsong, college-ni Graduation Day, 2022-ko manianio jinmana parakataha. Graduation Day-ko manianiona, Additional District Magistrate, J.U. Kharpuri, Guest of Honour ong·e sokbaaha aro Sngap Syiem College-ni principal, Dr. KK Nongsiej, Rambrai Constituency-ni MDC, Bajop Pyngrop, teacher-rang, poraigipa chatro chatrirang aro graduate ong·giparangni ma·gipa pagiparangba bakko ra·angaha.
Tynsong-ni aganani gitade, sorkari November 2022-na skangde, South West Khasi Hills-na dingtangmancha chittiko on·atgen aro jensalo ua chitti be·en pilgen unon, Sngap Syiem College-ko, Community College ba manderangni college ine biming donanggen.
Tynsong-ni aganani gitade, South West Khasi Hills-o District-o donggipa manderangna aro mangsongbate kangal cholgrigipa nokdangni manderangna, Shillong-ona re·ange a·gilsakni senganirangko skie ra·na gita namen rakgipa kam ong·a, uni giminsa gesamangmang dongpaenggipa college-ko, jolo donggipa chadamberangna namdapatna gita nangaha.
Indake, Sngap Syiem College-ni Principal. Dr. KK Nongsiej-ba, college-ni dingtang dintang bakrangko namdapatna gita, memorandum-ko on·angaha aro memorandum-ko man·ani gita, Sngap Syiem College-ni tangdoaniko sorkari nikna sika aro namdapatanina dakchakaniko on·anggen, ine Tynsong aganangaha.
