SHILLONG: Meghalaya a·doko BJP dol, NPP-chi dilenggipa Meghalaya Democratic Alliance (MDA)-o bakrimaniko ra·pilna miksongengon, a·dokni sakgni BJP MLA-rang, chong·motan AL Hek aro Sanbor Shullai-ba MDA-oni ong·katako namnikpaenga ine Mongolbar salo, BJP-ni national vice president aro Meghalaya a·dokni in-charge M Chuba Ao parakataha.
Iani bidingo kobor ra·timgiparang baksa agangrikatengon, MDA sorkario bakrimaniko watna skang BJP MLA sakgni nangnikanikoba uamang ra·chengaha aro MLA sakgnian da·o MDA-oni ong·katako namniktokpaenga ine Ao parakataha.
“MDA sorkario bakrimaniko watna gita dingtang dingtang niamrang donggen aro chinga sorkarioni ong·katna kamrangko ka·gen,” ine Ao aganaha.
Meghalaya a·doko BJP dol, opposition dol ong·e dongangskagen ine janapatengon, MDA sorkario nanga gitan membor-rang dongani gimin uamang ong·katgenchimoba MDA sorkaride dongaikugen ine Ao parakataha.
MDA-oni ong·katgenchimode MLA-rangoni saksa Cabinet-ni biapko gimaatskagnok ine sing·on, BJP MLA sakgnian an·tangtangni kamrangko on·kangna kusi ong·tokenga ine Ao parakataha.
MDA sorkario bakrimaniko watna parakatani ja·man bakan a·dokni Chief Minister Conrad Sangma, New Delhi-ona re·ange, Union Home Minister Amit Shah-ko Mongolbar salo grongeskaahachim ine nikna man·a.