SHILLONG: Tura-ni BJP MDC Bernard Marak-ni ‘Rimpu Bagan’-o bang·a manderangko rim·e kragija dake sasti on·ahani gimin National Human Rights Commission (NHRC), ia mamlao jak donggipa official-rangni kosako nanga gita ja·kurangko de·gen ine a·dokni BJP dol, ka·dongchakenganiko parakataha.
Rimpu Bagan-o rim·ako man·gipa bang·a manderangan an·tangtangni kosako kragija dake sasti on·e roahani gimin songbadrangoba parakataha ine janapatengon, “Rimpu Bagan-o rim·a man·gipa manderangni parakanirangko chinga nikmanaha aro uamangoni mitamrangde Human Rights Commission-na badi ka·doaha. Uamangni parakani gitade, uamangko niam grisa dingtang dingtang case-rango rim·e kal·ake roaha,” ine BJP-ni state president Ernest Mawrie parakataha.
Iani bidingo bang·e aganangkuna jechakatengon, da·o dipet ia case kachariosa ong·enga aro dos donggipa manderangni kosako Human Rights Commission nanga gita ja·kurangko de·anggen ine Mawrie, an·tangni ka·dongchakenganiko parakataha.
West Garo Hills a·jani Deputy Commissioner aro Superintendent of Police (SP)-ko ra·galchina dabienggipani bidingo janapatskaengon, BJP-ni state vice president Bernard Marak-ko rim·aniara iano nangchakeani dongna nanga ine Mawrie parakataha.
Re·anggipa July-ni 23 tariko, noti dari dakanio jak donga ine Rimpu Bagan-oniko rim·ako man·gipa manderangoni sak 24-de Human Rights Commission-na badi ka·doangahachim ine nikna man·a.