Cheristerfield-ko police-rangni so·otaniko CBI-chi sandirokatchina HYC dabia

SHILLONG: Hynniewtrep National Liberation Council (HNLC)-ni gitcham general secretary Cheristerfield Thangkhiew-ko police-rangni so·otani bidingo One Man Commission-chi inquiry dakchina sorkarini ge·etaniara manderangni ding·chaoaniko namatna dakanisan ong·aia ine Hynniewtrep Youth Council (HYC) matnangatenba, ia a·selni bidingo kakketko ma·sina aro dos donggipa police officer-rangni kosako sastirangko on·na man·na gita iani bidingo Central Bureau of Investigation (CBI)-chi sandirokatchina a·dok sorkario dabiangaha.

A·dokni Chief Minister-na sedoatgipa chittio HYC-ni parakatani gitade, Cheristerfield Thangkhiew-ko police-rangni so·otanio jak donggipa police officer-rangna sastirangko on·na man·na gita jakgitel ong·gipa investigation agency-chi sandirokna nangenga aro iani bidingo badiaba dolchi inquiry-ko dakna a·bachengataha ong·oba iako CBI-na pakwate on·na nangenga.

“Ia a·selni bidingo One Man Commission-ni inquiry dakanio police-rangni kamko dos galahachim indiba da·onan dos donggipa police official-rangni kosako sorkari ja·kuko de·kujaenga. Uni gimin ia a·selko CBI-chi sandirokatenba, dos donggipa officer-rangna nanga gita sastirangko on·na nanga,” ine HYC-ni dilgiparang parakataha.

Re·anggipa bilsio HNLC bobil dolni gitcham general secretary Cheristerfield Thangkhiew-ko rim·na gita police-rangni uni nokko chadrapeanio, police-rangni chanchininggija aro nangana bate bilko jakkale ja·ku de·ahani a·selsa ua sina gita nangaha ine Justice T Vaiphei-ni inquiry report-o parakatahachim.

HNLC bobil dolni gitcham general secretary Cheristerfield Thangkhiew-ko police-rangni pringwal 3:00 bajio rim·na re·anganiara chanchininggija kam ka·aniko mesokani ong·aha aro police-rang bilko nangana bate jakkaljagenchimode uko sianiona sokatjawachim ine ia a·selni bidingo inquiry dakgipa commission-ni report-o parakahachim.

Thangkhiew-ni nokko chadrapegipa police dol, kontagnimangna sengkuenba seng·bana on·chenge, sianggipa mande aro uni nokdangni kuturirangchi teargas grenade-ko goatgenchimode, nokni manderangko ong·katchina draatgnokchim aro unode sianggipa mandeko altuaen rim·na man·genchim aro uni nokdangni gipin manderangnaba naljokaniko on·na man·genchim ineba Inquiry Commission-ni report-o parakahachim.

Get real time updates directly on your device, subscribe now.

Comments are closed.