Tangka gri dormahani order-ko on·a ine SSA skigiparang matnanga

TURA: Skigiparangni account-rango tangka paisarangko chipatgija a·dok sorkari, dormahani order-kosan on·e skigiparangko cha·bokna jotton ka·aha ine Bristibar salo, All Garo Hills SSA School Teachers Association (AGHSSASTA) matnangataha.
AGHSSASTA-ni parakatani gitade, SSA skulrango skigiparang, re·anggipa June jaonin dormaharangko man·soa dongkujachim aro 2016-2017 bilsini bangki arrear-rangkoba man·tokkujaengachim.
“Dingtang dingtang district-ni bank account-rango tangkarangko chipatgija a·dok sorkari, dormahani order-kosan on·aiaha. Iani bidingo District Mission Coordinator-ni accountant-rangoniko sandion, SSA skigiparangna tangka paisarangko watata dongkuja ine ma·sina man·aha. Ian a·dok sorkarini skigiparangko cha·bokna jotton ka·aniko mesokanisa ong·aha,” ine AGHSSASTA-ni president LG Momin parakataha.
Momin-ni parakatani gitade, SSA skigiparang aro mongsongbate Durga Pujako manienggipa Hindu skigiparang, puja chuttina skangan an·tangtangni dormaharangko man·na ka·dongsotokahachim indiba skigiparangko sorkari cha·bokskaaha.
“Skigiparangna tangka paisarangko on·atgija maikai sorkari, dormaha on·ani order-ko on·na man·aha? Uni gimin skigiparangni account-o tangka paisarangko chipatgija salary order-ko on·aniara ong·aiama, uko chingna talate on·china chinga sorkario dabienga,” ine AGHSSASTA-ni president parakataha.
AGHSSASTA-ni parakatani gitade, skigiparangni man·na nangkuenggipa dormaharangko on·na aro 2016-2017 PAB-ni jachetni arrear-rangko on·na gita ma·mong sorkari, gong kror 272.46 tangkarangko watataha ine a·dokni Education Minister Lahkmen Rymbui parakahachim indiba da·alonan skigiparang an·tangtangni man·na nangkuenggipa dormaha aro arrear-rangko man·skakujaengachim.