SHILLONG: Sukrobar salo, jingjengatenggipa skigiparangni Secretariat-ona napdraangengmiting somoio police-rangni skigiparangko tear gas godapahani gimin a·dokni Home Minister Lahkmen Rymbui, district administration-oniko report-ko bi·ataha.
Iani bidingo talataniko on·angengon, ia a·selni bidingo minggni dake koborko man·soahani gimin talbate ma·sie ra·na gita ua District Administration-oniko report-ko bi·ataha ine Sukrobar salo, a·dokni Home Minister Lahkmen Rymbui, kobor ra·timgiparangna parakataha.
“Secretariat-o Section 144 CrPC-ko ra·gata dongani gimin jingengatenggipa skigiparangko Secretariat-ona napangna on·jaengachim. Skigiparang manigija Secretariat-ona napdraangani ja·man ia a·sel ong·aha. Uni gimin anga report-ko bi·ataha aro report-ni kri nanga gita ja·kurangko de·gen,” ine Rymbui parakataha.
Kamoniko ra·gala man·gipa contractual skigiparangko kamo ra·pilchina dabie re·anggipa September 7 tarikonin Civil Hospital bibrao jingjengatanirangko dakengachim indiba Bristibar salo skigiparang, an·tangtangni nokdangni manderang baksa Secretariat-ona napdraange jingjengatna jotton ka·skaahachim. Skigiparangni napdraangengmiting somoio police-rang uamangko champengsona jotton ka·ahachim indiba jinma manigija napdraangon police-rang, skigiparangko katatna gita tear gas ge·gittamko godapatahachim.
Ia a·sel ong·ani ja·mano, dingtang dingtang dolrang, skigiparangni kosako iandake bilko jakkalahani gimin a·dok sorkariko matnangatskaaha aro a·dokni Home Minister-ko kam watchina dabiangtokskaaha.
Indake ong·engon, kamoniko ra·gala man·gipa skigiparangko kamo rakkipilna gita sorkari, dingtangmancha order-ko on·kujaskalde skigiparang jingjengataniko dontongjawa ine Meghalaya Government Lower Primary Contractual Teachers Association (MGLPCTA) parakatskaaha.