SHILLONG: Khasi, Jaintia aro Garo Hills-ni daka rikani, cha·a ringani, wata chengani, sika koani, git ring·ani, chrok mesaani aro dakmesokanirangko mesokna gita Tri Hills Ensemble-ko mijal Sukrobar saloni a·bachenge salgnina ong·atenga aro ia program-ko Sukrobar salo a·dokni Chief Minister Conrad Sangma, a·bachengate on·angaha.
Ia Tri Hills Ensemble-ko a·bachengate on·angani somoio a·dokni Arts & Culture Minister Sanbor Shullai, Arts & Culture-ni Commissioner FR Kharkongor, Arts & Culture-ni Director SK Marak aro dingtang dingtang officer-rangba dongpae bak ra·angaha.
Ia Tri Hills Ensemble-ko a·bachengate on·angani somoio a·dokni sakgittam matgrikrang, chong·motan U Tirot Sing, U Kiang Nangbah aro Pa Togan Nengminjani mangkrongrangkoba oprake on·angjolaha.
Ia program-ko ong·atanio dingtangmancha damdok songrangna, dingtang dingtang award-rangkoba Chief Minister-ni jakchi on·angaha aro ia award-ko man·gipa damdok songrangara, East Khasi Hills a·jani Mawryngkhang, West Jaintia Hills-ni Larnai, Ri Bhoi a·jani Pahambir, East Khasi Hills-ni Tangmang, Eastern West Khasi Hills-ni Mairang aro West Garo Hills a·jani Amindagre song ong·a.
Ia Tri Hills Ensemble-ko a·bachengate on·angani somoio a·dokni Chief Minister, jinmana aganprakangengon, ian a·songni jakgitelaniko man·aoni bilsi 75 gapaniko aro Meghalaya a·dokni bilsi 50 gapanikoba maniani bilsi ong·engani gimin Meghalaya a·dokna namen dingtangmanchagipa bilsi ong·enga aro ia salgnina ong·atenggipa program-ara jatni daka rikanirangko mesokna namgipa chol ong·enga ine parakangaha.
