SHILLONG: Meghalaya a·doko BJP-ni dilanichisa ma·mongni dingtang dingtang namroro silroroani scheme-rangko ra·bana man·enga ine Mongolbar salo, BJP-ni state president Ernest Mawrie a·kangatenba, re·baenggipa 2023 bilsioba BJP gride Meghalaya a·doko sorkariko rikna man·jawa ine parakataha.
Re·baenggipa 2023 bilsini Assembly election-o dingtang dingtang political dolrangan, chegipa ong·e sorkariko rikna ka·dongtokengani gimin Mawrie, ia kattarangko aganaha.
“Ia political dolrang, bangbangosa nokrangko riktokenga. Manderang mamingkoba ma·sija aro manderangko tol·na man·gen ine ia political dolrang chanchienga indiba Meghalaya a·dokni manderang BJP-ni kamrangko nikenga maina BJP dolsa ma·mongni dingtang dingtang scheme-rangko ra·bae manderangni janggi tanganiko dingtangatenga,” ine BJP-ni state president parakataha.
Ia changode a·dokni manderang, namroro silroroaniko ra·banagipa aro maming tangka paisa jakkalsreta gri manderangna kakketo dangdike on·china gita BJP-chi dilgipa sorkarikosa seokna sienga ine janapatengon, 2023 bilsio BJP gride sorkariko rikna man·jawa ine Mawrie parakataha.
Re·baenggipa 2023 bilsini Meghalaya Legislative Assembly election-o National People’s Party (NPP), bang·bate seat-rangko chena man·gen aro gital sorkariko rikna gita gipin dolrangni bakrimaniko nangjawa ine Sombar salosan, NPP-ni state president aro Rajya Sabha-ni MP WR Kharlukhi, an·tangni ka·dongchakenganiko parakatahachim ine nikna man·a.