TURA: Ganol chibisikko tangatpilna gita Payment for Ecosystem Services (PES)-ni ning·o dingtangmancha dam 18 songrangna, Mongolbar salo Rongram C&RD Block-ni ning·o donggipa Oragitok songo program-ko ong·atangenba, a·dokni Forest & Environment Minister James PK Sangma aro GHADC-ni Chief Executive Membor (CEM) Albinush R Marak, skanggipa bakni cheque-rangko suale on·angaha.
Ia cheque-rangko suale on·angani somoio a·dokni Forest Minister, jinmana aganprakangengon, ia namgipa ja·kuko de·chakatahani gimin Centre of Excellence for Natural Resources Management & Sustainable Livelihood-ni Co-Chairman aro Director Dr Subhash Ashutosh-ko mittelpilangaha.
A·dokni pilak biaprangon sin·a ding·a batroroenganichi aro dingtang dingtang neng·nikanirangko chagrongna nangengoba a·dok sorkari, PES-ko jako ra·e ka·angna man·aha ineba Sangma parakataha.
Iandakgipa neng·nikanirangko chagrongna nangengmiting somoirango sorkari ja·kurangko de·chakatna nanga ine janapatengon, samtangtango ong·telaigiparangko ripingna gita iandakgipa ja·kuko de·dilahani gimin ua a·dokni Chief Minister-ko mittelpilangaha.
Ia tom·anio GHADC-ni CEM Albinush Marak-ba jinmana aganprakangengon, chiring chibisikrangko aro chi on·gipa pilak biaprangko chel·chakna kam ka·anio bakrimaniko on·china gita songni nokni manderangko didiangaha.
Ia salo, PES-ni ning·o skanggipa bakni cheque-rangko man·gipa songrangara Bibragre, Chandigre, Darechikgre, Daribokgre, Do·pananggre, Dura Kalakgre, Dura Kantragre, Dura Songma, Pagugre, Ganol A·pal, Ganol Songma, Selbalgre, Misimagre, Matchurigre, Sasatgre, So·ragre, Tosekgre aro Wa·dagre songrang ong·a.
Ia tom·anio dongpae jinmana aganprakanggipa gipin manderangara, Centre of Excellence for Natural Resources Management & Sustainable Livelihood-ni Co-Chairman aro Director Dr Subhash Ashutosh, Nokma Council-ni vice president Wenison Ch Marak, Dura Songma-ni Nokma Prenilla A Sangma, West Garo Hills DRDA-ni Project Director DBG Momin aro gipinrang ong·a.