TURA: A·songna dangdike on·anio janggitangtangko gimaatna nanggipa sipairangko gisik ra·na aro mande ra·pilskana gita Sukrobar salo, Garo Hills-ni dingtang dingtang biaprangoba Police-rang, Police Commemoration Day-ko maniangtokaha.
South West Garo Hills a·jao ia Police Commemoration Day-ko Ampati Police Station-o maniangaha aro ia manianio South West Garo Hills a·jani Deputy Commissioner G Kharmawphlang aro Superintendent of Police (SP) Steve Rynjah-ba bakko ra·angaha.
Ia Police Commemoration Day-ko manianio District Executive Force (DEF)-ni dingtang dingtang officer-rang aro sipairang bakko ra·angenba, a·songna dangdike on·anio janggitangtangko gimaatna nanggipa sipaiskarangna, skorangko choknoke mande ra·pilskaaniko dakangaha.
Indake ong·engon, ia Police Commemoration Day-ko West Garo Hills a·jani Goeragre-o donggipa 2nd MLP Battalion-ni headquarter-oba maniangaha aro ia manianio 2nd MLP Battalion-ni Commandant, senior officer-rang aro gipin sipairangba bakko ra·e sianggipa sipairangna mande ra·pilskaaniko dakangaha.
Ia salo 2nd MLP Battalion-ni officer-rang, sianggimin sipairangni nokdangrangonaba re·ange dingtangmancha mande ra·pilskaaniko dakangaha.
Ia salara dingtangmancha 1959 bilsini October 21 tariko Ladakh-ni Hot Spring-o, a·songni simarangko chel·chakenggipa sipairangko Chinese Army-rangni chadrapanio so·ota man·gipa sak 10 CRPF sipairangko gisik ra·na gita manienggipa sal ong·achim.
