SHILLONG: NPP-chi dilenggipa MDA sorkariko tangka paisa jakkalsretanina aro dingtang dingtang kamrango ong·gija dakanirangna matnangtokengon, NPP-ni ‘ki·tap’ noksaon maikai sorkarini department-rangoniko tangka cha·na man·gen, uani giminsa seaha ine Sukrobar salo a·dokni Opposition Trinamool Congress (TMC) matnangataha.
“Sorkarini chu·sokatgimin kamrangko nie an·ching chief minister-ko aro NPP-chi dilenggipa sorkariko sing·dogenchim ong·ode, NPP-ni ‘ki·tap’ noksaon maikai tangka paisarangko jakkalsretna man·a aro maikai sorkari department-rangoniko tangka cha·na man·gen, uarangkosa sea ine anga an·tangde agangen,” ine TMC-ni chief whip George B Lyngdoh parakataha.
NPP-ni ‘ki·tap’ noksao maikai manderangni man·gnirangko jechakgen aro maikai tangka paisarangko cha·na man·gen, uarangni giminsa odhaini odhai seaha ineba Lyngdoh matnangataha.
TMC-ni kosako matnangani kattarangko aganahani gimin NPP-ni state president aro Rajya Sabha-ni MP WR Kharlukhi-ko matnangatskaengon, ua an·tangni sorkarini kamrangko mittele opposition dolko matnange agangen ine a·bachengonin uamang ma·sienga ine TMC-ni chief whip parakataha.
“Sorkarini kamrangko mittele aganna aro manderangni nanganirangko knachakgija dongchina gitasa uko kamo donataha, ong·jaode ua president-ni kam aro MP-ni kamkon man·jawachim. Ia kamrangko man·ani giminsa ua sorkarini kamrangko mittele aganrongenga,” ine Lyngdoh aganaha.
Tangka paisarangko jakkalsretenga aro dingtang dingtang kamrango ong·gija dakenga ine matnangako man·rongengani gimin FIR ka·china ba Lokayukta-ni kachario badi ka·china ong·jaode iandake skatang matnange rojachina gita National People’s Party (NPP), Opposition TMC dolko ra·biatahachim ine nikna man·a.
Iandake ra·bianina aganchakaniko on·angskaengon, uamang kachariona re·angahaode ia sorkari, manderangni ku·rangko knachakja ine kakket ong·katskagnok ine TMC-ni dilgipa parakataha.
Uamang a·dokni manderangna chanchigipa opposition dol ong·e, sorkarini ong·gija dakgipa kamrangni giminde ku·rang on·na nangaigen ineba Lyngdoh parakataha.
NPP-chi dilenggipa MDA sorkari, High Court-ni ge·etanirangnaba maming mande ra·aniko mesokani dongja ine ua parakataha.
