SHILLONG: Meghalaya Police-ni headquarter-o garirangko jakkalsreta ine matnangenggipani bidingo a·dok sorkari, ia antini gisepo Meghalaya High Court-na aganchakaniko on·anggen.
Law department-oni official saksani parakatani gitade, sorkarini gisepo agangrikanirang chu·ongjahani a·sel iani bidingo sorkari, aganchakaniko on·ningna man·jahachim.
Matnangako man·enggipa police officer-ni kosako department-ni gita ja·kurangko de·na skang sakkirangko aro dingtang dingtang bosturangko sandina nangahani gimin department-ni gita ja·kurangkoba de·na man·ningjaha ineba Law official parakataha.
Meghalaya High Court-ni ge·etaniko manijahani gimin aro kakketko am·sandianio kamrangko champengna jotton ka·ahani gimin Home department-ni Secretary-ni kosako High Court, suk ong·gijaniko parakahachim.
Iani bidingo Meghalaya High Court, re·anggipa September-ni 30 tariko hukumko on·atenba, sorkarini gam-jinko jakkalsretgipa manderangni kosako ja·kurangko de·ani aro iani bidingo mai dakgipa ja·kurangko de·ahachim, uarangko Home department-ni Secretary gita report-ko on·china a·dok sorkariko u·iatahachim.
High Court-ni u·iatani gitade, ia report-ko a·dok sorkari, October 17 tarikon on·na nangachim.
Report-ko October 17 tarikon man·ahaoba, iani bidingo hearing-ko dakani somoio ia report-ko jako ra·na gita affidavit-ko ka·a dongjahani gimin ia case-ko October 19 tarikona ra·doatskaaha.
Ia report baksana da·o affidavit-koba ka·aha.