SHILLONG: Doctor-rang aro health specialist-rang, a·arangko brena man·jaengani gimin Meghalaya a·dokoni re·ongkattokenga ine Bharatiya Janata Party (BJP) suk ong·gijaniko parakatenba, doctor-rangna Meghalaya a·doko a·arangko brena on·china a·dok sorkariko didiataha.
Meghalaya a·doko BJP dolko dilenggipa AL Hek-ni parakatani gitade, Meghalaya Land Transfer Act donggenchimoba Indian Administrative Service (IAS) aro Indian Police Service (IPS) officer-rangde a·arangko ra·na man·aiachim indiba Meghalaya a·dokona re·bae kam ka·enggipa doctor-rangde a·arangko brena man·jae neng·nikanirangko chagrongna nangtokskaengachim.
Meghalaya a·doko doctor-rangni kamko bakroatna nangengani gimin janapatengon, “Gipin officer-rang jekai a·arangko bree songdongna man·enga, apsan daken gipin biaprangoni re·bae kamko ka·enggipa doctor-rang aro uamangni nokdangrangba dongkame kamko ka·na man·na gita cholko on·na nanga,” ine Hek parakataha.
IAS aro IPS officer-rangde a·doko pangnajolna dongkame kamko ka·janaba gnang indiba doctor-rangde janggi tanga gimikan dongkame kamko ka·skanaba gnang ineba ua aganaha.
Doctor-rangna a·arangko on·jaengani a·selan bang·a doctor-rang aro health specialist-rang Meghalaya a·dokoni re·angpiltokaha ine janapatengon, iani bidingo a·dok sorkari ta·raken maikobade dakna nangchongmota ine BJP-ni dilgipa parakataha.
Meghalaya a·dokni North Eastern Indira Gandhi Regional Institute of Health & Medical Sciences (NEIGRIHMS)-ko man·chape dingtang dingtang hospital-rango kam ka·enggipa doctor-rang, a·doko a·arangko brena man·jaengani gimin bang·a doctor-rangan a·dokoni re·angpilatokahani gimin ia kattarangko Hek aganaha.
Health department-o kamrangko ka·anio bang·en olgrokanirang dongengani gimin ua bang·en badi ka·anirangko man·soaha ineba Hek parakataha.
108 ambulance service-ni gimin janapatengon, 108 ambulance service-ko a·dok sorkari jako ra·na skangde kamrang namachim aro manderangna bang·a namgnirangko on·ahachim indiba 108 service-ko a·dok sorkari jako ra·ani ja·man, bang·a manderangan iani bidingo badi ka·na a·bachengaha ine Hek parakataha.