SHILLONG: University of Science & Technology Meghalaya (USTM) aro Guwahati-o donggipa ERD Foundation-ni kulienggipa PA Sangma International Medical College & Hospital-ko a·bachengatani bidingo dingtang dingtang ra·bianirangko ma·sina gita dingtangmancha session-ko USTM-o ong·atangaha aro ia session-ko ong·atanio dingtang dingtang biaprangoni sak 50-na baten doctor-rang bakko ra·angtokaha.
Ia session-ko a·bachengatanio USTM-ni Chancellor Mahbubul Hoque, tom·anio bak ra·gipa doctor-rangna rimchaksoani kattarangko aganangenba PA Sangma International Medical College & Hospital-ko a·bachengatani bidingo power point presentation-chi jinmana agan-talate on·angaha.
Ia hospital-ko a·bachengatani skanggipa bilsignio dingtangmancha doctor-rangna, healthcare seminar-rangko, workshop-rangko, conference-rangko aro training session-rangko ong·atanggen ineba Hoque parakataha.
Ia college aro hospital-na pangchakaniko songani kamrangko a·bachengatmanaha aro 2024 bilsini July jaode ia hospital-ko rikani matchotgnok ineba USTM-ni Chancellor parakataha.
Ia college aro hospital-o MBBS-ni skanggipa batch-na 2025 bilsini August jaode a·bachenggnok ineba Hoque parakataha.