SHILLONG: Opposition-ni dilgipa, Mukul Sangma-ni aganani gitade, FKJGP-ni sorkariko jegale re·jomaanio kraggija obostarang ong·anian, MDA sorkariko mikrakchina aganenga.
TMC-ni Block Level tom·aniko, Gambegre, West Garo Hills-o ong·atanio manderangna aganani dakengon, FKJGP re·jomaanio ong·gijagipa obostarang ong·anina ua suk ong·gijaniko parakataha.
”Ua somoi obosta ong·ani, Meghalaya-ni itihas-o duk man·batgipa obosta ong·aha. Kamrangko man·jaani ba on·jaanina re·jomagipa dambe manderang an·tangtangni suk ong·gijaniko aro gisiko ka·o nanganiko mesokangaha aro niamko an·tangtangni jako ra·aha. Ia mikkangchina mikraksona nangani ong·a aro iana simsakna nangenga,” ine Sangma aganangaha.
A·doko ong·enggipa obostarangni gimin agananiko dakengon, Meghalaya-ni TMC MDC, Sadhiarani Sangma, MDA sorkari a·dokna tom·tomaniko ra·bana gita man·jaenga, ine aganangaha.
”Bang·a obostarangna jegalanirangko an·ching batanggimin salrangonin nikenga, jekai teacher-rangni jegalani. Ua jegalanirangkoba tom·tome dakna on·jaenga, uni gimin anga manderangko mol·molna ska, hai TMC-na dakbo aro dingtanganiko ra·babo,” ine ua aganangaha.
Apsan daken, Meghalaya BJP-ni president, Ernest Mawrie, kamtangtangko ka·enggipa ramam manderang, skul re·gipa bi·sarang aro journalist-rangko, FKJGP-ni re·jomaanio skatang dokaniko jegale aganangaha.
FKJGP-ni president ong·gimin obostarangna kema bigenchimoba, kema bia baksana FKJGP kragija dakgipa manderangko am·sandie, kakket bichalko on·a gita rim·bana gita nanga, ine ua aganangaha.
Mawrie-ni aganani gitade, tom·tome dakgija ramram manderangko doke sate re·jomaaniko dakaniara, organisation aro jolo donggipa songsalni bimingkoba nosto ka·a ine aganangaha.
Ong·gimin obostarang social media-rango ta·raken gipangaha aro a·gilsakni pilak manderangan niksoe, Shillong aro Meghalaya-ko namja inesa masitokengaha. Mawrie-ni aganani gitade, kosako donggipa, BJP-ni dilgiparang, Shillong-ni law & order-ni gimin suk ong·gijaniko parakataha aro ian kratchana nanggipa obosta ong·a ine agantokaha.
Ong·gimin obostarangko name dake am·sandianiko dakchina, Home Minister-ko agana baksa, indakgipa obostarango police-rangko on·gijaniara ba donatgijaniarang, sorkarini chu·sokgijaniko mesoka aro ian namen chachina nangenggipa obosta ong·enga ine ua aganangaha.
Indake, police-rangni parakatani gitade a·sel ong·anio sak 3 manderang saknaako man·aha indiba First aid ba sananiko dakani ja·manon uamangko watatpilaha. Indake da·o dipete, police ramram manderangko kragija dakgiparangko rim·ani giminde parakatkuja indiba obostarangko name aro talbate masina gita am·sandianirangko dakenga ine parakataha.
