TURA: Garoland a·dokna dabianio National Federation for New State (NFNS) dolba chakpaaniko on·engon, re·baenggipa December jao, Parliament-ni winter session-ko ong·atanio salgnina asonge jingjengataniko dakna gita tik ka·angaha.
“December jao Parliament-ni winter session-ko ong·atengmiting somoio chinga Delhi-o salgnina asonge jingjengataniko aro tom·aniko ong·atanggen. Ia jingjengatanio NFNS-ni bipekrang aro dingtang dingtang dolrangba bakko ra·anggen. Ia jingjengatani aro tom·bimonganio chinga Garoland a·dokna dabienggipani bidingo ma·mong sorkarina gisik ra·ataniko on·anggen,” ine NFNS-ni president Munish Tamang parakataha.
Garoland-na dabie Tura-o jinma tom·bimonganiko ong·atanio NFNS-ba bakko ra·angaha ine talataniko on·angengon, Garo Hills-o songdongenggipa manderang ru·uta bilsirangonin dingtang Garoland a·dokna dabitokengahani gimin uamangba ia dabianio chakpaaniko on·enga ine Tamang parakataha.
Garoland a·dokna dabie jinma tom·bimonganiko Sonibar salo, Tura-ni Te·teng A·jao donggipa College field-o ong·atangaha aro ia tom·bimonganio Garoland State Movement Committee aro NFNS dolrangna agreba Hill State People’s Democratic Party (HSPDP), Tripura a·dokoni Indigenous People Front of Tripura (IPFT) aro uandakgipa dingtang dingtang dolrangba re·bae bakko ra·angtokaha.
Ia tom·bimonganio Garo Hills-onisan ong·aigija India a·songni salgro salaramo donggipa dingtang dingtang a·dokrangoni aro Telengana a·dokni dilgiparangba re·bae bakko ra·angaha.
Jinma tom·bimongani ja·mano dingtangmancha jinma re·jomanikoba College field-oni a·bachengate, AOC, Hawakhana aro Circuit House junction gita wenbae, apsan biapon matchotataha.
Ia jinma tom·e re·jomaniko ong·atanio maming so·sojengjeng ong·atanirangko dakgija tom·tome matchotatahani gimin West Garo Hills a·jani police-rang, ia tom·bimonge re·jomaniko ong·atgipa dolrangko mittelpilataha.
Parliament-ni winter session-ko ong·atanio ‘Garoland’-na dabie jingjengatgen
Date:
Share post:
