TURA: National Highways & Infrastructure Development Corporation Limited (NHIDCL)-ni Project Monitoring Unit (PMU)-rango kam ka·enggipa manderang, a·doktangni chuttini salrangoba chuttiko man·pajae chuttini salrangoba kamrangko ka·tokna nangenga ine Association for Democracy & Empowerment (ADE) parakatenba, NHIDCL-ni PMU-o kam ka·enggipa manderangnaba state holiday ba a·doktangni chuttini salrangode chuttiko on·pachina ine West Garo Hills a·jani Deputy Commissioner-na sedoataha.
Iani bidingo West Garo Hills a·jani Deputy Commissioner-na sedoatengon, NHIDCL-ni PMU-o kam ka·enggipa manderangde a·doktangni chuttini salrang, jekai Garo Labour Corps Day, Capt Williamson sagini siani sal, 100 Drums Wangala maniani, Pa Togan Nengminja sagini siani sal aro uandakgipa dingtang dingtang chuttini salrangoba chuttiko man·tokpajaenga aro ian NHIDCL-ni PMU-o kam ka·enggipa manderangko nichanggalani gita ong·enga ine ADE-ni general secretary Supam Marak parakatenba, NHIDCL-ni PMU-o kam ka·enggipa manderangnaba iandakgipa chuttini salrango chuttiko on·china mol·molataha.
“Dingtang dingtang department-rango kam ka·enggipa manderangde iandakgipa chuttini salrango chuttiko man·engani gimin manianirangoba bakko ra·pana man·enga indiba NHIDCL-ni PMU-o kam ka·enggiparangde chutti dongpajani a·selan iandakgipa maniani ba program-rangoba bak ra·pana man·jaenga. Uni gimin chinga iandakgipa chuttini salrangode NHIDCL-ni PMU-o kam ka·enggiparangnaba chuttiko on·pachina mol·molenga,” ine ADE-ni dilgiparang, West Garo Hills a·jani Deputy Commissioner-na sedoatgipa chittio parakataha.