TURA: Budbar salo All Souls’ Day-ko hajalni hajal Roman Catholic bebera·giparang maniangaha, jeon sigiminrangni janggina bi·chakanirangko dakan baksana mombatirangko so·e aro nitobegipa pulrangko uamangni gopramrango done uamangna gisik ra·aniko dakaha.
Gopram maniani salo dingtangmancha bi·chakanirangko dakaha aro sigiminrangni gopramrango pamong, jean tom·aniko dilengachim, uni jakchi holy water ba rongtalgipa chiko sate pattianiko on·angaha.
Cathedral gopram jean Bishop House sepango dongachim, ua gopram manianio Tura-ni Catholic pamongrang tom·aniko dilangaha aro sigiminrangna bi·chakangaha. Ia salo Catholic pamongrang namgipa kattarangko aganangengon, bi·anichi pilakkon chu·sokatna man·a aro ian sakantini janggi tanganina nangchongmotgipa ong·a ine aganaha. Sianggiminrangna bi·chakanirangara uamangna tom·tomaniko ra·baanisan ong·aija indiba ning·tubatgipa tom·tomaniko uamangna bi·anichi donangna man·a ineba pamong aganaha.
Ia gopram manianiko Tura-osan ong·aigija Garo Hills-ni ki·tikbrion Catholic bebera·giparang, gopramrango pulrangko done aro mombatirangko so·e an·tangtangni sianggipa ma·drang bakdrangrangko gisik ra·na aro Isolo bi·chakna gita maniangtokaha.
