SHILLONG: A·dokni politics-o me·chikrangkoba bak ra·atpana man·na gita re·baenggipa 2023 bilsini Assembly election-na Bharatiya Janata Party (BJP)-ni tikitko me·chikrangnaba on·china gita BJP Mahila Morcha-ni national president Vanathi Srinivasan didiangaha.
Budbar salo, Meghalaya BJP Mahila Morcha-ni tom·anio bak ra·ani ja·man kobor ra·timgipa manderang baksa agangrikengon, BJP bak ong·gijade darang dolrangan sorkariko rikna man·jawa ine Srinivasan parakataha.
Chol ong·nagipa biaprangode me·chik candidate-rangkoba basee susaatchina a·dokni BJP dolko didiangengon, “Ia election-o bang·bata me·chikrangna tikitrangko on·china chinga mol·molenga,” ine Mahila Morcha-ni national president parakataha.
Kam changgipa aro gisik nanggipa candidate-rangkosa sandichina didiangengon, election-o susana sikenggipa me·chikrangkoba iana gisiko nangchina aro kamrangko skie ra·china Srinivasan didiangaha.
Meghalaya a·doko susana sikenggipa me·chikrang bang·en donga aro uamangko tarina gita BJP kamko ka·enga ineba ua aganaha.
“Re·baenggipa election-o bang·bata me·chikrangni susaaniko anga nikna sikenga. Me·chikrang ong·aiani giminde party tikitko am·jachina indiba an·tangtangan kragipa candidate ong·na gita gunrangko mesokchina,” ine Srinivasan aganaha.
Me·chikrangni kosako ong·gija dakanirangko janapatengon, je biaprangon me·chikrangni kosako ong·gija kamrangko ka·engachim uandakgipa biaprango pangnan BJP, me·chikrangna bakrimanirangko on·enga ine BJP Mahila Morcha-ni national president parakataha.
“Anga bebera·a an·ching sakantian, me·chikrangni aro bi·sarangni bilko chel·chakna gita India sorkarini ra·gatgipa gital niamrangni gimin ma·sitokaha,” ineba ua aganaha.
Randirangni neng·nikanirangko chel·chakanian ia election-o a·dokni BJP dol, mingsa mongsonggipa miksongani ong·gen ineba Srinivasan parakataha.