SHILLONG: Meghalaya sorkarini a·bachengatgipa FOCUS, FOCUS+, PROGRESS, YESS Meghalaya aro CIF-ni namgnirangko Bristibar salo, a·dokni Chief Minister Conrad Sangma, West Jaintia Hills a·jani Laskein Block ning·o donggipa Raliang songo suale on·angaha.
Game ge·e cha·enggipa manderangko dakchakna gita sorkarini ra·gatgipa FOCUS+ program-ni ning·o ge 207 nokdangrangna gong lak 2.07-ni card-rangko a·dokni Chief Minister suale on·angaha.
Ia FOCUS plus program-ara game ge·e cha·enggipa manderangni namgnina sorkarini ra·gatgipa Farmers Collectivization for Upscaling Production and Marketing System (FOCUS)-ni ra·dodapatgipa program ong·a aro ia program minggnichi a·doko game ge·e cha·enggipa nokdangrangna nokdang ge·prako gong 10,000 tangkarangko sorkari dakchake on·engachim.
Ia apsan salon, Laskein Block ning·o donggipa Self Help Group (SHG)-rangni namgnina Community Investment Fund (CIF)-ni gong lak 61.80-ni cheque-rangko jolo donggipa dol 10 Village Organisation-rangna suale on·angaha.
Ia tom·anio Laskein Block-ni ning·o donggipa dol 13 chadambe dolrangnaba YESS Meghalaya program-ni ning·o gong lak 5.40 tangkarangko Chief Minister-ni jakchi suale on·angaha.
Iana agreba Rural Backyard Piggery Scheme ba PROGRESS scheme-ni ning·oba West Jaintia Hills a·jao game ge·e cha·enggipa ge 267 nokdangrangna nokdang ge·prako wak bi·sa mangbriko aro kuroiler do·orangko suale on·angaha.
Ia tom·bimonganiko ong·atanio a·dokni Chief Minister, jinmana aganprakengon, “West Jaintia Hills a·jao game ge·e cha·giparangna, self help group-rangna aro chadambe dolrangna dingtang dingtang scheme-ni tangka paisarangko suale on·na gita namen kusi ong·a. Meghalaya a·dok gimikon chingni sorkari, game ge·e cha·enggipa manderangni janggi tangani gadangko tang·doatna rakbee kamko ka·enga. Game ge·e cha·enggipa manderangni man·gniko changgni bariate pangkamgipa janggi tanganiko on·anian chingni miksongani ong·a. Batanggimin bilsibri atani gisepo chinga dingtang dingtang program-rangko ra·gate on·na man·aha,” ine Chief Minister parakataha.
