SHILLONG: Special Force-10-ni Commandant Gabriel K Iangrai-ko jekon Police department-na building-ko rikna on·gipa tangkako jakkalsretani mamlao rim·aha, uko service-oniko dondipataha.
Ia koborko Sonibar salo on·atengon Home Minister Lahkmen Rymbui, indine aganaha, “iani bidingo mamlako segataha aro dos dakgipako rim·aha. Niamo pangchake chu·gimik kamrangko ka·anggen.”
Shillong Sadar Police Station-o National Emergency Response System (NERS), Public Safety Answering Point (PSAP)-ko rikna on·atgipa tangkako cha·ani mamlako FIR-ko segatanina Iangrai-ko rim·aha.
Home Ministry, NERS PSAP project-na 95.78 lak tangkako watatahachim, ua project-ko Police department, Meghalaya Financial Rules, 1981-ni Appendix 9-ni niamo pangchake jako ra·aha.
Project-ni kamrangko Iangrai, Assistant Inspector-General of Police (Administration) ong·mitingo a·bachengataha. Aro project-ni kamna lak 95.78 tangkako jakkalaha ine mesokgipa nokli certificate-ko on·aha. Estimate ba DPR-ba dongja, mamlako sandigipa dol, Sadar Traffic Branch-ko taridapna lak 3 tangka jakkalani estimate-kosan man·aha.
Electrification-na 3,37,470 koros ka·ani estimate-ko mesokaha indiba chong·mote bosturangni dam 1,85,608-san ong·aia, iarang chu·gimikko man·gope NERS builsing aro Sadar Traffic Branch-ko taridapanio 33,01,674 san bon·aha.
Iarangna agreba Iangrai, nokli certificate-kosan sorkarina on·aija unbaksanaba lak 95.78 tangka jakkalani bidingo audit ka·gnikoba jechakaha aro ia bilsi September jani 19 tariko 26,85,389 tangkako Official AIG (A)-na on·pilaha.
Audit-ni ja·man nokli certificate-ko on·aha ine inquiry team ba sandigipa dolrang parakaha.
