TURA: East Garo Hills a·jao Simsanggre village court-ni membor-rangko seokanio niamrangko pe·ani ja·man da·o apsan a·jani Rongsak village court-ni laskar-ko seokanioba Garo Hills Autonomous District Council (GHADC)-ni dilgiparang, niamko pe·enga ine A·chik Organisation for Social Welfare (AOSW) matnangataha.
AOSW-ni general secretary Premiar N Sangma-ni parakatani gitade, Rongsak village court-ni gital laskar-ko seokna gita election-ko ia bilsini August 24 tariko ong·atna GHADC-ni Rural Administration u·iataniko on·ahachim aro ia election-o mande sakgittam, chong·motan Janggin T Sangma, Kewingson Marak aro Arbitson Sangma susaangahachim.
“Rongsak village court-ni ning·o sak 46 A·king Nokmarang dongachim indiba sak 46 A·king Nokmarangoni sak 39-san gital laskar-ko seokna pu·onaiaha aro ianoni sak 5-ni vote-rangkode jegalahani gimin sak 34 A·king Nokmani vote-rangkosan ra·aiaha. Ia election-o Janggin T Sangma, ge 31 vote-rangko man·e chegipa ong·aha, Kewingson Marak ge 2 vote-rangko man·e gnigipa ong·skaaha aro Arbitson Sangma-de vote ge·sakosan man·skaaiaha. Election-o cheani ja·man Janggin T Sangma-ni bimingko ra·chakna gita GHADC-ni chief executive membor (CEM) Albinush R Marak-ona wataton, ia election-ko una u·iatchenggija ong·ataha ine aganenba, ua gital seoka man·gipa Janggin T Sangma-ko ra·chakna jechakaha aro iako ua an·tangan re·anggipa November 1 tariko AOSW-ni membor-rang baksa uni office-o tom·e chanchirimengmiting somoio ku·rachakaha,” ine AOSW-ni general secretary parakatenba, gital seoka man·gipa Rongsak village court-ni laskar-ko GHADC-ni CEM, NPP-ni membor ong·jani giminsa jegalaha ine matnangataha.
Sangma-ni parakatani gitade, village court-rangni gital laskar-rangko seokna nangon GHADC-ni ning·o donggipa Rural Administration-ni official-rangnasa bilko on·manahani gimin uamangsa election-ko ong·atna man·achim aro uandaken Rongsak village court-ni gital laskar-ko seokna gitaba August-ni 24 tariko election-ko ong·atchina GHADC-ni Rural Administration-sa ge·etaniko on·ahachim.
“Election-o susae vote ge·sako man·rikgipa Arbitson Sangma-ra NPP-na kam ka·gipa ong·achim aro ua election-o amako man·ahani gimin NPP-ni dilgiparangna badi ka·ahani giminsa GHADC-ni CEM, ia election-ko jegale Rongsak village court-ni gital seoka man·gipa laskar Janggin Sangma-ko ra·chakna jechakaha. Ia election-o NPP-na kam ka·gipa mande chegenchim ong·ode haida election-ko gipin dolrang ong·atgenchimoba uamang ra·chakainaba gnangchim,” ine AOSW-ni general secretary suk ong·gijaniko parakataha.