SHILLONG: Meghalaya a·dokara chonbegipa a·doksan ong·aia aro ia a·dokko bak dakdapagenchimode mamingan dongsrangjawaha ine Meghalaya a·dokko bak dakdapjachina a·dokni Rajya Sabha MP aro National People’s Party (NPP)-ni state president WR Kharlukhi, a·doko songdongenggipa manderangko didiataha.
Garo Hills-o songdongenggipa manderangna dingtang Garoland a·dokko dingtang dingtang dolrang dabitokengani gimin Kharlukhi ia kattarangko aganaha.
Kharlukhi-ni parakatani gitade, Lok Sabha-ni gitcham Speaker PA Sangma sagini somoirangonin A·chikrang, Meghalaya a·dokko bak dakna skani dongjachim.
“Skang somoirangonin a·dokko bak dakchina dabianirang donggenchimoba PA Sangma sagide a·dokko bak dakna skani dongjachim aro Garo Hills-ni manderangba unbaksa bakrimaniko on·ahachim,” ine Kharlukhi aganaha.
Salgro salaram a·dokrango songdongenggipa Tribal manderangara chonchongipa jatrangsan ong·aia ine janapatengon, ia chonbegipa a·dokrangko bak dakkugenchimode mamingan dongsrangjawaha ine Kharlukhi parakataha.
“NPP-ko manderangni gisepo ku·cholsan ong·atna gita miksonganiosa bikotaha. NPP-ni niksamsoanian salgro salaram jol gimikko ku·cholsan ong·atani ong·enga, jedakode maiba kamrangko dabina Delhi-ona re·angengon, komibeoba sak 15 ba sak 16 MP-rang apsan re·ange ku·rangko on·na man·gen,” ine NPP-ni state president aganaha.
A·dokko bak dakroroe dongaigenchimode a·dok bilakgipa ong·na man·chipjawa aro ma·mong sorkariba dabianirangko knachakjawa ineba ua parakataha.
Indake ong·engon, re·baenggipa 2023 bilsini Assembly election-o NPP dol, bang·bate seat-rangko chena rake kamko ka·soenga ine Kharlukhi parakataha.
NPP state president-ni parakatani gitade, Garo Hills-osan ong·aigija a·dok gimikon NPP dol, seat-rangko chena gita rakbee kamrangko ka·soenga.
Garo Hills-o Trinamool Congress (TMC) dol inditana bilakgipa ong·kuja ineba Kharlukhi parakataha.