SHILLONG: West Khasi Hills a·jani gital Rambrai C&RD Block-ko Budbar salo, a·dokni Chief Minister Conrad K Sangma-ni jakchi do·ga oe on·angaha aro ia gital block-ko do·ga oe on·anganio MLA Kimfa Marbaniang aro MDC Bajop Pyngrope-ba dongpae bak ra·angaha.
Ia Rambrai C&RD Block-ko Nongstoin C&RD Block-oniko bakenba kulie on·aha aro ia block-ni ning·o square kilometer 584.628 biaprangko man·chapenga. Ia gital block-o dam 109 songrang aro sak 36148 manderang donggen.
Ia gital Rambrai C&RD Block-ko do·ga oe on·anganio a·dokni Chief Minister, jinmana aganprakangengon, ia gital block-ko kulianichi songadam nokadamrango namroro silroroaniko ra·bana dakchakani ong·gnok ine parakangaha.
“Manderangna miksonge ra·gate on·gipa scheme aro program-rangko manderangona sokatna gita block-rangan nangchongmotgipa aro mongsonggipa bak gita ong·a aro block-rangara manderangoni sepanggipa biapon ong·na nanga. Rambrai jolo songdongenggipa manderang an·tangtangni nangchongmotgipa kamrangna chel·begipa ramarangkosa block headquarter-ona re·na nange neng·nikanirangko chagrongna nangtokengachim indiba da·o ia gital block-ko songe on·ahani gimin block-ni kamrangko songni manderangona sepangbatatgnok,” ine Chief Minister aganaha.
Manderang dingtang dingtang certificate-rangna block-ni gadangon dorgastorangko galna man·gen indiba dorgastorangko sub-division-osa nigen ine talataniko on·angengon, ian a·dokni bang·a manderangnan namgni ong·gnok ine Sangma aganaha.
Nongstoin-Rambrai-Kyrshai ramako tarina a·bachengaha aro ia ramako bakan matchotgnok ineba Chief Minister, ia tom·anio parakataha.
Chief Minister-ni parakatani gitade, ia ramako gong kror 231 korosrangchi tarienga.
Rambrai PHC-ko CHC-ona ra·doatna gita bakan pangchakaniko songe on·anggnok ineba Chief Minister parakataha.
