TURA: Chang 46-gipa 100 Drums Wangala Festival ba dama bol 100-ko doke Wangala manianiko mijal Bristibar salni bako Chibragre-ni Wangala A·damo a·bachengataha aro ia skanggipa salo Handloom & Handicraft Exhibition-ko a·bachengate on·angan baksana jatni kal·susaanirangkoba ong·atangaha.
100 Drums Wangala manianiko a·bachengatani somoio Garo Hills Autonomous District Council (GHADC)-ni Chief Executive Membor (CEM) Albinush R Marak, mongsonggipa sokgipa ong·e bakko ra·angaha aro unbaksa GHADC-ni gipin Executive Membor-rang, chong·motan Linekar K Sangma, Nathawal S Marak, Nokma Council-ni membor-rang aro Hundred Drums Wangala Festival Committee (HDWFC)-ni dilgiparangba dongpae bak ra·angaha.
Ia 100 Drums Wangala manianiko a·bachengatani somoio GHADC-ni CEM, jinmana aganprakangengon, ia chang 46-gipa 100 Drums Wangala manianiko ong·atna rakbee kamrangko ka·ahani gimin committee-ni membor-rangko mittelpilangaha.
Pagitcham ma·gitchamrangni a·bachengatgipa ia dakbewalko ripinge rakkiangkuchina gita didiangengon, jatni dakbewal rikbewalrang gimajana gita iandakgipa manianirangko committee-san ong·aigija jat gimikan ripingna nanga ine Marak didiangaha.
Ia Wangala manianiko a·bachengatanio 100 Drums Wangala Festival Committee-ni chairman Ronald Rikman Sangma-ba jinmana aganprakangengon, Chibragre-ni Wangala A·damo da·o dipet ia manianiko a·bachengatanisan ong·engkua aro mikkangchi ia biapko nambate taridapangkuna nangenga ine parakataha.
A·chikrangni ia nitobegipa dakbewal rikbewalko mesokna man·aniara A·chik sakantinan mikkim rasongni ong·a ineba Sangma aganaha.
Ia 100 Drums Wangala manianiko a·bachengatanio Handloom & Handicraft Exhibition-koba GHADC-ni CEM, do·ga oe on·angjolaha.
Ia 100 Drums Wangala manianiko a·bachengatani salo, Jakpong Pe·a, Rong·ma Chilsusaa, Rong·ma Gosusaa, Wa·pong Sika, An·ding Oka aro uandakgipa jatni dingtang dingtang kal·susaanirangkoba ong·atangaha.
Bilsi gimiko game ge·e man·gipa mi misina pattigipa ra·rongipa Misi Saljong-ko mittelpilani gita bilsiantian A·chikrang Wangala manianiko dakronga aro uandaken ia dama bol 100 doke Wangala manianiko batanggimin ru·uta bilsirangonin A·chikrang ku·cholsan ong·e manirongbaenga ine nikna man·a.
