SHILLONG: Re·baenggipa 2023 bilsini Assembly election-o Congress dol, a·dokni gimik dam 60 constituency-rangon susagen ine Sombar salo, Meghalaya Pradesh Congress Committee (MPCC)-ni president Vincent Pala parakataha.
MPCC president-ni parakatani gitade, da·o dipet Congress dolni sak 57 candidate-rangde 2023 bilsini Assembly election-o susana tarimanaha.
Indake ong·genchimoba re·baenggipa bilsio, uamang National People’s Party (NPP) ba Trinamool Congress (TMC) baksa bakrimgenma ine sing·aninade ua mamingkoba aganchakna gita jechakaha.
2013 aro 2018 bilsirangode Congress dol, dal·batsranggipa dol ong·e chegipa ong·ahachim indiba da·ode Congress dol a·doko namen bilgriangahachim ine nikna man·a.
Re·anggipa bilsiosan Congress dolni sak 12 MLA-rang TMC-o napangskaahachim aro bangki dongenggipa sakbonga MLA-rangba MDA sorkario bakrimaniko on·anina Congress doloni ra·galako man·skaahachim. Ia sakbonga MLA-rang da·o Congress dolona re·angpilna skanirang dongskajaengaha aro gipin dolrango nape election-o susaskana miksongtokengachim.
Indake ong·engon, Congress dolni bang·bata manderangan Congress dolko watangenga ine agananikoba MPCC-ni president aro Shillong-ni Lok Sabha MP jegalataha.