AMPATI: Bilsignina COVID sajinmani a·sel chipe donatani ja·man Kalaichar Border Haat-ko kulipiltaina gita Mongolbar salo, Indo-Bangla Joint Border Haat Management Committee, Kalaichar Border Haat-o tom·e chanchirimangaha aro ia tom·anio South West Garo Hills a·jani Deputy Commissioner Gideon Kharmawphlang aro Bangladesh a·songni ning·o donggipa Kurigram a·jani District Magistrate Md Rezaul Karim dongpae, tom·aniko dilangaha.
Ia tom·aniko ong·atanio South West Garo Hills a·jani Superintendent of Police (SP) Steve Rynjah, Additional Deputy Commissioner-rang, Border Area Development Officer (BADO) aro gipin official-rangko man·chape Bangladesh a·songni Customs Officer, gipin official-rang aro Haat Committee-ni membor-rangba dongpae bak ra·angaha.
Ia tom·anio a·song damgnini dilgiparang aro official-rang apsan chanchirimangengon, Kalaichar Border Haat-ko re·baenggipa November 30 tarikoni kulipiltaina aro antini Sombar aro Budbar salrango salgnina kulina gitaba tik ka·angaha.
Ia Border Haat-o ming 62 bosturangko bading chiwalgrikna, palbadinggiparangko sak 50-ona bariatna, Border Haat-ko nitodapatna aro bazar cha·chakgipa biapko kadulna gitaba ia tom·anio Indo-Bangla Joint Border Haat Management Committee tik ka·e donangaha.
Ia Joint Border Haat Committee-ni tom·aniko komibeoba bilsio changprak ong·atna gitaba ia tom·anio tik ka·angaha.
2020 bilsionin COVID-19 sajinma giproroahani gimin ia Kalaichar Border Haat-ko chipe donatahachim aro untalan ia haat-ko kulipilkujaengachim ine nikna man·a.
