TURA: Tura-o donggipa National Highway & Infrastructure Development Corporation Limited (NHIDCL) office-o Multi Tasking Staff (MTS)-ni kamna maming advertisement ba jinmana u·iatchengani gri interview ra·aniko dontongatani ja·man da·o ia apsan kamna NHIDCL-ni video conference gita interview ra·anikoba Association for Democracy & Empowerment (ADE) jegalattaiaha.
ADE Apex committee-ni general secretary Supam R Marak-ni parakatani gitade, MTS-ni kamna maming advertisment gri porikka ra·na am·aniko ADE jegalatani ja·man ia kamna NHIDCL dingtangmancha advertisment-kode on·ahachim indiba ia kamna interview-ko video conference gitasa ra·na miksongskaengachim.
Iani bidingo NHIDCL, PMU-Tura-ni general manager-na sedoatengon, “Da·o COVID-19 sajinmani matchotangani ja·man kamna interview-ko video conference gita ong·ataniara namen gokani aro candidate-rangna ra·chakna man·gijani ong·enga. Uni gimin ia kamna interview ra·anio maming dongnuani dongjana gita aro Garo Hills-ni pilak candidate-rangan ia kamna interview-ko ra·pana man·na gita mikkangpara interview-ko ra·china chinga didienga,” ine Marak parakataha.
Re·anggipa September jaosan ia apsan kamna maming advertisement gri NHIDCL-ni interview ra·na jotton ka·aniko ADE champengatahachim ine nikna man·a.