Congress, NGH-o mikkang election-o name dakna ka·dongenga: DYC

RESUBELPARA: North Garo Hills (NGH) District Youth Congress (DYC)-ni mingsa executive tom·aniko mija November 24 tariko, national secretary, Nur Sofiqul Wazid, Indian Youth Congress (IYC)-ni dongpaanio Resubelparao ong·atangaha jeon sak 500 mang North Garo Hills-ni YC worker-rang bakko ra·angaha.
A·goko general assembly election-rang sepangbaengahani gimin party-na chakgipa memborrangko man·dapna aro party-ko bilakbatatna miksonge ia tom·aniko ong·ataha. Indake ong·engon North Garo Hills-ni ning·ogipa pilak constituency-rangnan Youth Congress-ni gita office bearer-rangkoba seokangaha.
YC-ni District President Timjim Momin-ni aganani gitade, district-ni ning·ogipa seat ge 4 gimikkon chena man·na gita party-ko bilakatna gita kamrangko seng·gnang a·bachengaha aro re·baenggipa salrangoba raken ka·angkugen.
“Congress pangnan ongipa gadangonin chakgiparangko bang·en man·roanga aro chinga party memborrang ong·e, a·doko niam-ainrangni bilgrianiko aro cha·boke cha·anirangko aganani pal, a·dokni namroro silroroani gimin agan-janapenba manderangko an·tangtangchi salbana jotton ka·gen,” Timjim aganaha.
Re·baenggipa 2023 bilsini assembly election-na North Garo Hills-o Youth Congress-ko bilakatsona gita tom·anio gital office bearer-rangko seokaha. Tom·anio, National secretary, Indian Youth Congress Nur Sofiqul Wazid-ba tom·anio mongsonggipa sokgipa ong·e bakko ra·aha.
Indake Resubelpara-o chakatna am·enggipa Dr Tuel K Marak, Silman K Sangma, Kharkutta constituency-o chakatna am·enggipa Omilo K Sangma aro Josepine Marak mangba tom·anio dongpaaha.
North Garo Hills-o Congress name dakna man·gen ineba Timjim, party tom·anio manderangna ka·donganiko aganaha.
‘‘North Garo Hills-de Congress-ni a·daman ong·a. A·jolni manderang da·oba gitchambegipa a·gipi party baksan ong·kuenga aro district-ni ia ge 4 constituency-rangon name dakna man·gen ine ka·dongenga,’’ Timjim aganaha jean a·tangba Mendipathar constituency-oni susana gita mikpakma nienga.