Assam-M’laya-ni kenchakbatna nangenggipa simarango BoP-rangko songna tik ka·a

SHILLONG: Re·anggipa November 22 tariko West Jaintia Hills a·jani Mukroh songo, Assam police aro forest guard-rangni goanichi Meghalaya a·dokni mande sakbongako man·chape gimik sakdok manderang so·otako man·ani ja·man, Assam aro Meghalaya simani kenchakna nangbaenggipa biaprango Border Outpost (BoP)-rangko kulina a·dok sorkari manchiangaha.

Sombar salo, dingtang dingtang political dolrang baksa Mukroh songo ong·anggipa a·selni gimin tom·e chanchirimangani ja·man iako a·dokni Chief Minister Conrad K Sangma, kobor ra·timgiparangna parakataha.

“Border outpost-rangko kulina sienggipa biaprangko knal (Mongolbar) salni bakon Cabinet tik ka·anggen aro kenchakna nangbatenggipa biaprango BoP-rangko songna tik ka·ani bidingo chinga da·al salni bako dingtang dingtang political dolni dilgiparangna talate on·aha. Ia BoP-rangko chu·gimik chalaiani bidingo chinga dingtang dingtang political dolrang baksa agan-chanchirimaha,” ine Sangma aganaha.

A·dok damgnini simarango songdongenggipa manderangna naljokaniko on·na gita a·dok sorkari, pilak nanga ja·kurangko de·gen ineba Chief Minister parakataha.

Mukroh jolo donggipa Assam Forest Beat House-ko chipchina gita dingtang dingtang dolrang aro jolni dilgiparangni dabienggipani bidingo janapatskaengon, ua iani bidingo Assam sorkari baksa agangrikgen ine Chief Minister parakataha.

Mukroh jolrango dolsa police-rangko donataha aro ia jolrango obostarang namsrangkuja dipet ia police-rangko ua biapon donangkugen ineba Chief Minister parakataha.

Mukroh songara, Meghalaya a·dok ning·o ga·akgipa songan ong·a ineba Chief Minister, gisik ra·ataniko on·angtaiaha.

“Wa·reng salanirangba aro 2011 bilsini report-rangba Mukroh songko Meghalaya a·dok ning·o ga·akgipa songan ong·a ine mesoka,” ine Sangma aganaha.

Dingtang dingtang political dolrangni tom·e chanchirimanio, dingtangmancha Mukroh songo a·sel ong·e sianggipa janggirangna aro kalimenggipa nokdangrangna dikdiksa jrip donge bi·chakanikoba dakangjolaha.