SHILLONG: SSA skulrango skigiparangni dingtang dingtang dabianirangko chu·sokate on·na gita a·dok sorkari State Education Commission-ni Search Committee-ko songaha ine Bristibar salo, a·dokni Deputy Chief Minister Prestone Tynsong parakataha.
Bristibar salo, Meghalaya SSA Schools Association (MSSASA)-ni dilgiparang, skigiparangni dingtang dingtang dabiani bidingo a·dokni Deputy Chief Minister-ko gronge agangrikeani ja·man iako kobor ra·timgiparangna parakataha.
MSSASA-ni president Aristotle Rymbai-ni kobor ra·timgipa manderangna parakatani gitade, a·dok sorkarini songe on·gipa Search Committee-ko Chief Secretary dilgen aro ua State Education Policy-ni Chairperson aro membor-rangko songna gita bimingrangko agan-ku·pattie on·angskagen.
SSA skigiparangni dabianirangko chu·sokatna gita a·dok sorkari ia ja·kuko de·aha ine a·dokni Chief Minister Conrad Sangma-chi dilenggipa MDA sorkariko mittelpilangengon, State Education Commission-ko songanichi, SSA skigiparangni dormaharangko bariatchina dabianiko aro a·dokni sak 12,541 SSA skigiparangko state implementation society-oniko state education department-ona apjitatchina dabianiko chu·sokatna a·dok sorkari ku·rachakataha ine Rymbai parakataha.
“Re·anggipa November-ni 9 tariko chingni deputy chief minister baksa tom·e chanchirimanio, State Education Commission songaniko Cabinet ra·chakangaha aro iani bidingo a·dok sorkari, Search Committee-ko songenba, chief secretary-ko commission-ni dilgipana seokangaha,” ine MSSASA-ni president aganaha.
SSA skigiparangna October aro November jagnini dormahako Krismasna skang watatna gitaba ia tom·anio a·dokni Deputy Chief Minister ku·rachakataha ineba Rymbai parakataha.
“Uni gimin da·alo iandakgipa ka·dongbegipa ja·kuko de·ahani gimin chinga Chief Minister Conrad Sangma-chi dilenggipa MDA sorkariko mittelpilna ska maina State Education Commission-ko songna gita Cabinet ra·chakaha,” ine ua aganaha.