SHILLONG: 2014 bilsini ja·man jekai Congress sorkari siangna siako ma·sie kamrangko ka·chichae mesokahachim, apsan daken da·o National People’s Party (NPP)-ba, an·tangtangni siangna sienganiko aro manderangni ka·a ding·chaoaniko ma·sie kamrangko ka·chichamike mesokna jotton ka·engaha ine Mongolbar salo, Meghalaya BJP-ni state president Ernest Mawrie parakataha.
Ia sal somoirango Meghalaya a·dokni bang·a biaprangon, gital block aro gital sub-division-rangko NPP-chi dilenggipa MDA sorkarini songe on·anirangko nikna man·engachim.
Indake ong·engon, batanggimin bilsibri atana ia sorkari maming kamrangkon chu·sokate on·jahani gimin manderangni namnikgijaniko nikengahani giminsa da·o bon·kamgipa somoirango NPP dol, kamrangko ka·chichae mesokna jotton ka·skaengaha ine Mawrie matnangataha.
“Batanggimin bilsi 4.5-ni gisepo uamang maming kamrangkon manderangna chu·sokate on·jaha ine NPP ma·sienga. A·dokni manderang uamangko ra·gale galna tarisoaha ine uamang ma·siahani giminsa jekai 2014 bilsini ja·man Congress sorkari, an·tangni napsrimangna sianiko ma·siahachim apsan daken NPP-ba an·tangtangni bon·na siengako ma·sie, a·dokni bang·a biaprangon gital sub-division aro gital block-rangko songe on·enga,” ine Meghalaya BJP-ni state president parakataha.
Bang·bata project-rangkon matchotchenggijasa NPP sorkari songe on·enga aro foundation stone-rangkoba maming tarisamsoani grisa songe on·enga ineba ua matnangataha.
“Angni nikani gitade uamang ja·manchakdugaaha aro ia pilakkon uamang manderangko cha·boknasa dakenga,” ine Mawrie parakataha.
Batanggimin bilsi 4.5-ni gisepo a·doko chu·sokatgipa pilak kamrangkon BJP-chi dilenggipa ma·mong sorkarini scheme-rangchisa chu·sokatahachim ineba Mawrie parakataha.
NPP sorkarini rasong dakenggipa FOCUS scheme-ni gimin janapatskaengon, ma·mong sorkarini scheme-rangko biming mingsree manderangko togina jotton ka·genchimoba ia changode manderangko togina man·jawaha ine NPP-ni state president parakataha.
“Meghalaya a·dokni manderangna a·songni Prime Minister Narendra Modi, mai dingtanganiko ra·baaha uko manderang namen ma·sia aro ia changode a·dokni manderang BJP-chi dilenggipa engine ge·gni donggipa sorkariko Meghalaya a·dokona ra·bana tik ka·aha,” ine Mawrie parakataha.