TURA: Batanggimin bilsirango Meghalaya a·dokni Bharatiya Janata Party (BJP), bang·en skie ra·na nanganirangko skie ra·manahani gimin da·o re·baenggipa 2023 bilsini Assembly election-ode nambate dakna man·gnok ine Bristibar salo, Meghalaya BJP-ni state vice president Bernard N Marak, an·tangni ka·dongsoenganiko parakataha.
2018 bilsini Assembly election-ode BJP dol, seat damgnikosan chena man·aiahachim aro uamangara, BJP-ni dilgipa AL Hek aro Sanbor Shullai ong·achim ine nikna man·a.
“2023 bilsini election-ode BJP nambate dakna man·gnok maina da·o chinga an·tangtangko nambate tarisona man·aha aro ia election-o chinga an·tangarisa susana siengaha. Batanggimin bilsirango BJP, NPP baksa kamrangko ka·rimahachim indiba NPP, BJP-ko ra·ongalna jotton ka·pilahani gimin chinga bang·en skie ra·manaha. NPP dolara BJP-ni B Team ong·ani gimin batanggimin chang election-rangode NPP-sa pangnan mongsonggipa bak ong·e kamko ka·achim indiba 2023 election-ode iandake ong·jawaha,” ine Marak parakataha.
BJP-na kamko ka·enggipa manderang pilakan an·tangtangni man·gnina kamko ka·giparang ong·ja indiba doltangko bilakbatatna aro songsalni namgnina kam ka·giparangsa ong·a ineba Marak parakataha.
“Chingni party worker-rang pilakan an·tangtangni man·gnina kam ka·giparang ong·ja indiba doltangna kakketo aro songsalni namgnina an·tangtangko on·kange kam ka·giparangsa ong·a. Ian BJP-ko onbatgipa gadangonin bilakbatataha,” ine Tura-ni MDC aro BJP-ni state vice president parakataha.
Ia chang Assembly election-o BJP, komibeoba seat dambriko chetelgen aro uamangni miksongani gita Garo Hills-o chu·sokgipa ong·genchimode una baten seat-rangko chegen ine Marak parakataha.
“Chinga Garo Hills-o komibeoba seat dam 15-ko chena krengenga aro ia seat-rangko cheani cholrangba donga. Ia chango chinga bilakbate kamko ka·gen aro chingko bon·atna miksongenggiparangko ra·bie susagen,” ine Marak parakataha.
2023 bilsio Marak an·tangba, South Tura constituency-oni a·dokni Chief Minister Conrad K Sangma baksa susana siengachim ine nikna man·a.
Adita salrangna skangsan, NPP-ni MLA sakgni, chong·motan Benedic Marak aro Ferlin CA Sangma baksana GHADC-ni gitcham CEM Dipul Marak aro GHADC-ni sakgipin gitcham MDC Sukharam Sangma-ba BJP-o napangahachim ine nikna man·a.
